Ki Paidbah ka thaiñ Sohra ki la ia mih ban iasnohkti lang bad ban pynpaw ia ka jingsngewlem halor ka jingkhlad noh u Raja Raghuvanshi.
Ha kane ka sngi naduh u MLA ka Sohra u Bah Gavin Mylliem, u MDC ka Sohra u Bah Titos W Chyne, u Syiem ka Hima Sohra u Freeman Sing Syiem, ki myntri jong ka Hima Sohra, ki dorbar shnong bad ki paidbah ki la iashim bynta da kaba snohkti lang ha ka jingthang mombati ha Saitsohpen Sohra.
Ha shwa ban pynlong ia ka jingialang thang Mombati, ka ophis u Syiem, ki paidbah ki la pynlong shwa da ka jingiaid rally kum ka dak ban pynrem jur halor ka jingshah kynthoh ba ka Sohra ka dei ka jaka ba jur ki kam sniew bad ha kajuh ka por ban sngewlem halor ka jingkhlad noh uwei u nongjngohkai pyrthei na Indore u Raja Raghuvanshi ha ka por ba u wan kai sha Sohra.
