Mynta ka sngi ki paidbah na ka San Shnong Ïooksi Pyllun kiba ki kynthup ïa ka Priang, Umdeinlieñ, Iooksi Kyanmynsar Thlongmoo, Ïooksi Ïapkhla bad ka Tongkait kila mih sha ka jingïalang u ma Nehimaya Tyngkan kum u kyrtong MLA ka Congress na ka 4-Mowkaiaw Constituency ha madan Ïooksi Kyanmynsar West Jaiñtia Hills District.
Kine ki paidbah naduh ki longkpa, ki longkmie, ki khun samla bad ki hep barit ka San shnong Ïooksi Pyllun kum ka dak ban ai jingkyrshah ïa u ma Nehimaya Tyngka na ka liang jong ki hadien ka jingïalang kila synñiang da ka pisa katba kot ka bor sha utei u nongmihkhmat kum ka jingkyrshan ba un ïaid shakhmat ban pynkhreh ïa ka jingïakhun MLA 2023.
Ïa ka prokram ha kane ka sngi la pynïaid da u ma Leonard Rabon President San Shnong ha ka jingïadonlang ki Waheh shnong na ka tei ka thaiñ, ki nongïalam ka seng Congress bad kiwei kiwei de ki riew rangbah kiba wan ban kyrshan ïa u ma Tyngkan.
Kum u kyrtong u ban ai reng ha kane ka Election 2023 na ka 4-Mowkaiaw Constituency u ma Nehimaya Tyngkan haba ai jingkren ula kyntu jur ïa ki paidbah na kine ki thaiñ kiba don hajan khappud bad ka Assam ba kin long kiba ïohi jngai haba jied ïa u nongmihkham uba trei hok na ka bynta ki paidbah ïa kiba u la angnud naduh mynshwa.
Ula kren ïa ki lai tylli ki bynta kiba long ruh ki jingkyntu ïa ki paid kane ka Constituency kata “ban sngap ïa kaba bha, ban peit ïa kaba bha bad ban kren ïa kaba bha” lada kum ki nongkyrshan ba radbah kin shim ïa kine ka bynta u kyrmen skhem ba ka jingjop kan wan ha kane ka kynti.
‘Kam long kaba eh ban jop ïa kane ka Election lada ki paidbha kin ai ka jingkyrshan da ka jingieid naduh ka mynsiem bad u ngeit skhem ba ka jingjop ha kane ka kynti kan wan ha ka dur jong ka jingieit jong ki paidbah ïa u”.
Shuh shuh ula kren diaw ‘wat ki nongrep hapoh ka jylla kiba la dep ban rep da ka umsyep ïa ki mar ki mata hynrei kila hap ban leit khaïi pat ha ki por mynmiet da kaba ai nuksa ïa u sying, u synsar, u rnga, shynrai bad kiwei de balei kane ka jia? U ma Nehimaya ula buh jingkylli bad kane ka paw ka jingjur palat ka jingbam sap jong ka sorkar kaba la hap ban lute naphang bad ban lum khajna na ki nongrep ha ki lynti ki syngkeiñ da kaba pyndonkam da ki pulit.
Ula kynthoh jur ïa kane ka sorkar ba mynta kaba ïalam da ka NPP ba ka long tang ka ñiang kohnguh jong ka BJP, da kaba ai nuksa ba ka sorkar mynta kaba la wanrah ka jingpyntreikam ïa u Aadhaar card ha kaba ki paidbah kin hap ban link lut ïa ki passbook jong ki bad kiwei de ki jingdonkam. Ula ong ruh kan sa poi ka por ba kane ka sorkar kan khang sa ïa ki mar ki mata jong ki nongrep kumba khang syndet ïa u Dewïong kaba la ktah ïa kiba bun ba lang kiba juh im ja na kane ka kam.
Ula kreh ha kaba ïadei bad jinglong jingman jong ka seng Congress da kaba ong haoid ki don ki MLA kiba la phet noh hynrei ki paidbah nongkyrshan pat kin ym phet satia da leilei, kumba long mynta ka sngi ha ka jingwan kyrshan jong ki ïa u ha ka jingïalang, ula pyntikna ba ha kane ka snem 2023 ki paidbah ka jylla kin ai ka jingsneng ïa kane ka sorkar MDA.
Ula pynrem ruh halor ka jingleit hiar jong u myntri rangbah sha kylleng ki jaka ban leit sam skim, da kaba ong ba kane ka long tang ka jingpynbeit briew bad kaba la pyllut kai ïa ka pisa naduh ka rukom shna pandal bad ka bai leit bai wan.
Haba pynkut ïa ka jingkreh ula kyntu jur ïa ki nongkyrshan jong ka San Shnong Iooksi Pyllun kum u kyrtong u ban ïakhun ïa ka Election yn sa jah nangne ban wad ïa ki mawlyngnai na kylleng ki shnong bad ki kyndong kynshrot kiba hapoh hapoh ka 4 Mowkaiaw Constituency bad ban sakhi ruh ïa ki jingduna ha kiba bun ki liang hapoh kane ka thaiñ.
Kiwei de kiba ai jingkren ha kane ka jingïalang kila kitnok kitrwiang ïa u ma Nehimaya Tyngkan ba un poi sha ka thong ka jingjop ha kane ka kynti 2023.
La pynshong shuh shuh ïa kane ka sngi da ki jingsdang tynrai, ki jingpule poitri, ki jinglehkai bad ki jingrwai bapher bapher na ki khun samla bad ki longkmie jong kine ki san shnong.
