Ki paidbah nongkyrshan jong u Kyrtong ka Congress (INC) na Awwi Khliehtyrshi hynnin ka sngi kila ïamih paidbah ban ai ka jingkyrshan ïa u ma Madonbai Rymbai hashwa ba un leit thep kyrteng haka jingïalang ba la pynlong ha phyllaw ka ïing Dorbar jong ka shnong Khliehtyrshi West Jaiñtia Hills District.
Ha kane ka sngi ki paidbah ka shnong naduh ki longkmie, ki longkpa bad ki khun samla kiba pynsngew da kaba rah ïa ki kti ban ai ka jingkyrshan pura ïa u ma Rymbai da kaba pynsngew ïa ki kam ba bha kiba une u MDC ba rim ula dep ban ai jingshakri ïa ka shnong naduh ki kam pynroi bad ki lad pynïoh kam pynïoh jam ïa ki khun ka shnong.
U ma Madonbai Rymbai haka jingkren ula ai ka jingïaroh ïa ki nongkitkam ka shnong kiba la khanglad ban pynlong shnong ïa kawei ka jaka kaba dang hap hapoh u pud u sam jong ka shnong Khliehtyrshi hajan ka jingkieng Myntdu kaba la wan ban buhai shnong na kiwei pat ki shnong.
Hadien kane ka jingïalang u ma Madonbai Rymbai lem bad ki nongkyrshah kila leit mih sha ophis jong u Deputy Commissioner ka WJHD ban thep kyrteng ïalade kum u kyrtong jong ka Congress (INC).