U Symbud Myntri Rangbah ka sorkar jylla ma Sniawbhalang Dhar uba dei ruh u National General Secretary ka NPP, ha ka jingïalap Election na ka bynta u kyrtong ka 6-Moodymmai-Nongkhroh Constituency u ma Jesse Suiam kaba la long ha shnong Tyrshang West Jaiñtia Hills District, ula ong ka jingmih jong ki paidbah mynta ka sngi 18 tarik u Rymphang ban ai jingkyrshan pura ‘ka pyni ïa ka dak jong ka Green Signal ba ka Party NPP kan jop beit ha kane ka kynti’.
Shuh shuh ula ong ka Election MDC mynta u snem kala long kaba shongshit bha bad kaba kham pher haba ïa nujor bad kiwei ki snem Election bala dep, kum ka Party ka don ka jingkyrmen skhem ban ïoh synshar hapoh ka JHADC da ka jingieit thep mynsiem jong ki paidbah nongshong shnong.
U ma Dhar ula ong naduh u snem 2008 kum u MLA, uno uno u kyrtong uba la pynïeng na kane Constituency ula long beit u nong jop ha manla ki Election MDC bad kane ka dei ka jingstad jong ki nongshong shnong ka thaiñ.
Ula pynsngew kam pher kiba bun kiwei pat ki Party kiba kren beiñ bad kynnoh ïa ka Party NPP namar ba ka long ka sorkar kaba treikam, da kaba u buh ka jingkylli lada kwah ïa ka sorkar kaba khlem shah kren ne shah kynnoh ka dei tang ka sorkar kaba thiah sngi.
Ka Party NPP kala synshar 7 snem ïa jylla bad ka dei ruh ka Party kaba ïadei jingmut ha ka rukom treikam, namar kata “katba dang shah kren, katta ki dang bun ki MLA hapoh ka sorkar” ong u ma Dhar.
Kumba long mynta hapoh ka Party kam don kano kano ka jingïaknieh heh bad ka dei ka Party kaba peit ïa ka eh ka shon u paidbah, u ong ruh ha ki por mynshwa ki sorkar kila kyllon tang katto katne bnai na ka jingïaknieh heh bad ha ka 5 snem kila don haduh 3 ngut ki myntri rangbah.
Ula kynthoh ïa ka Party VPP kaba tip tang ban kren paidbah khlem tip satia ban trei ïa ki kam, wat u President jong ka u bah Ardent ula don ha kiba bun ki Party, ym tip shuh hadien jong kane ka Election sa kaei ka Party kaba un thaw la ong u ma Sniawbhalang Dhar.
Ula pynsngew ïa ki kam pynroi kiba la wanrah hapoh ka Constituency jong u bad kine baroh la wanrah da ka sorkar NPP kaba don ruh ïa ka thong ban pynkiew ïa ka jylla hi baroh kawei. Ha kane ka kynti u kwah ba u MDC uba mynta u ma Jesse Suiam un jop beit ha ka sngi ñiew vote jong ka 24 tarik mynta u bnai. Da kaba pynkut ïa ka jingkren u ong ba ka sorkar NPP ka don ka jingthrang kaba hakhmat eh kata ka long ban shakri na ka bynta u paidbah ka jylla.
