Mynta ka sngi ki dkhot jong ka Jaintia Students’ Movement (JSM), ki la ia mih madan ha khmat Gate jong ka Kiang Nangbah Govt. College, Jowai ban pynsngew sha u bah Lakmen Rymbui ha ryngkat bad ki lama, ki pla card ryngkat ka jingpyrta kum ka jingpynkynmaw ia ka jingdawa College Sorkar kaba dei ka jingdawa kaba khlem pat lah ban pynurlong haduh mynta.
Na ka liang ki dkhot jong ka JSM hadien ba ki la ioh jingteip ia ka jingwan jong u Myntri ka tnat Pule Puthi ka sorkar Jylla u ma Lahkmen Rymbui sha Kiang Nagbah College ha Jowai, kumta ki la ialum lang bad tur shakhmat ban pyrta ïa ka jingdawa college sorkar ha East Jaiñtia Hills District.
Haba kren sha ki pathai khubor, u Education Secretary jong ka JSM central Body, u samla Heyboyme Myrpet, u la ong “Sngewsih ban ong ki hynñiew ngut ki nongmihkhmat kiba na ri lum Jaintia kim treh ban rah ïa kane ka mat jingdawa college sorkar hakhmat ka iïng dorbar thaw aiñ, ngi iohi pynban lyngba ki pathai khubor ba ka sorkar ka la wanrah pynban da ka jingkhalai casino, ngi na la liang ka seng ngi kwah ba kin wanrah ïa ka mat jingdawa college sorkar, namar wat ka jylla Assam kaba heh ruh kam pat wanrah ia ka casino hynrei hangne pat ka sorkar ka wanrah pynban da ka casino, kumta ha kane ka por ngi na ka liang ka seng ngi ban jur ba ka soarkar ka dei ban wanrah ia ka college sorkar hapoh East Jaiñtia Hills District, ka ban long ka jingiarap ia kiba duk ba shitom ba kin ioh ïa ka jingnang jingstad, lada ka sorkar kam sngap ïa kane ka jingdawa, nangne sha khmat ka seng kan sa nang pynjur shuh shuh ia ka jingiakhi ha ri lum Jaiñtia”.
U President rangbah ka Jaiñtia Students Movement u bah Leningstar Rymbai u ju pympaw ka jingsngew khia bad ong ba ‘Ka jylla Meghalaya ka dang shu dep ban rakhe ïa ka jingdap san phew snem ka jingioh jylla la ka jong, hynrei dang don shibun ki jaka, ki shnong ha ka jylla kiba dang sah dien bad shah iehnoh beiñ ha ka sorkar ha kiba bun ki liang, kumba ngi tip ba ka East Jaiñtia Hills District ka dei ka district kaba ju kyrshan radbah ïa ka sorkar ha ka jingioh khajna lyngba u dewiong, u mawshun, ka jingdon ki karkhana dewbilat bad kiwei kiwei ki jjingdon ka spah mariang, hynrei imat ka sorkar ka shu pynlong ïa kane ka District tang kum ka jaka ban lum spah ialade khlem phai khmat pat halor ka roi ka par jong ki paidbahka thaiñ, kane ka long kaei kaei ba ngi kum ka seng ngi sngew khia haduh katta katta namar kane ka paw ba ka dei tang ka jingshah ibeiñ ha ka sorkar”.
