Katba dang tyllun ki sngi, ki jingsniew ruh ki nangroi bad ka jingshngain ia ki khynnah bad Kynthei kam long shuh kum mynshwa. Ban iohsngew ia ka sur u Paidbah halor ka jingroi ki kam sniew bad ban pynrem ia ki ‘riew thrangsnam, ka Ka Sur u Paidbah ka Bri 7Trep (KSUPB7T) ka la rai ban pynlong ia ka jingialang Paidbah ha ka 24 Nailur ha Madan Malki Shillong ia kaba yn sdang naduh ka por 11 baje mynstep.
Dang khyndiat sngi, la ioh ia ka khubor ba kawei ka Hep barit ka la iap bad haduh mynta na ka liang ki bahaiing kim pat hun katkum ka kaiphod ba la ai da ki Pulit namar kum kitei ki jingjia la ju lap bad iohsngew man ka por. Ym lah ban len ba ka jingjyllei kiba dih drok ka la dei kawei na ki daw ba jia ka jingshah pyniap bad ka jingshah shoh. Kham bun na kum kine ki jingjia ka dei ia ki kynthei bad ki paidbah ki la kwah ban ioh jingshai la kane ka dei tang na u Drok ne na ka jingkwah jong ki briew ban pynhun ia ka jingkwah brai.
Ban ioh ia ka sur kaba shai na ki paidbah bad na ki nongialam jong ka ‘Ka Sur u Paidbah ka Bri 7Trep’ (KSUPB7T), ka Seng ka la mynjur ban lum ia baroh kynthup naduh ki Nongsynshar, ka Sorkar, ki Nongialam Niam, ki nongialam Shnong, ki Nongpyniaid Skul bad wan sha katei ka jingialang na ka bynta ban iohsngew lang ia ka sur kumno ban rat dyngkhong ia kum kitei ki jingsniew kiba la pyntieng ym shuh tang ia ki khynnah hynrei wat ia ki Rangbah.
“Ngim lah shuh ban iohsngew sa katno yn shah ban pyniap. La dei ka por ban iamih na ki Whatsapp jong ngi bad iawan lang da ka met” ong u Bah Thomas Passah nongaiktien jong ka Seng. Shuh shuh u la ong ha kaba iadei bad kane ka mat yn ai ia ka jingthoh sha u Governor bad sha ka Sorkar. “Donkam ia ka jingtreilang da ka Sorkar bad ki Bor Pulit” ong biang u Bah Passah.
