Ki nongshongShnong ka shnong Mawpat mynta ka sngi ka 21 tarik Naitung 2025 ki la mih paidbah da u shnong ban pyrshah ia ka jingplie ia ka ophis Block ha Mawpat.
Ka jingmih ban pyrshah ia ka jingplie ia ka ophis block ha Mawpat ka dei hadien ba ka sorkar kam burom ia ka soskular ba la iateh bad ka shnong.
Ha kane ka sngi ki paidbha ki la khang lynti ia u Myntri ka tnat C&RD u AT Mondal bad kumjuh ruh ia u Myntri ka tnat Fisheries u Bah AL Hek uba dei ruh u MLA jong kane ka thaiñ bad khlem ailad satia ba un leit ban plie ia kane ka ophis.
Na ka liang ka shnong bad ki paidbah nongshong shnong ki la dawa na ka sorkar ba ka dei ban pyndep ia ka kular kaba ki la kular na ka bynta ka Shnong ha shuwa ba kin plie ia kane ka ophis.
Wat hadien ba u Myntri ba dei peit ia ka tnat C&RD U AT Mondal u la pynshai paidbah bad kular ba ka sorkar kan sa pynbeit bad peit ia ki jingdawa jong ki hynrei kim shym la sngap ia kata bad ieng skhem ba kin ym ailad ban plie ia block thymmai mynta ka sngi bad ha kajuh ka por kila dawa ba dei ban buh tarik da kawei pat.
