Ki paidbah nongshong shnong jong ka shnong Jaraiñ kila mih paidbah bad wan tur ryngkat ki banner, ki placard bad ryngkat ki jingpyrta pyrshah bad ki jingthoh sha phyllaw ka ophis treikam jong ka Jaintia Hills Autonomous District Council (JHADC) ha ka 18.10.2021,
Kane ka jingleit tur paidbah sha phyllaw jong ka JHADC ryngkat ka jingrah ïaki placard bad pyrta dawa na konsil ban thung ïa u waheh shnong ba pura ha ka shnong Jaraiñ, namar kane ka kam Waheh Shnong ka long kaba la sah teng naduh u snem 2019 hadien ba la kut ka samoi treikam jong u waheh shnong barim u Kliarbha Sana.
Hadien ka jingwan lyngshop ka khlam COVID-19 ki paidbah kim shym la ïoh lad shuh ban jied ïa u waheh shnong thymmai bad u Dolloi ka Elaka Amwi u Jemewell Pyrtuh ula thung Acting Waheh shnong ïa u Ami Tariang bad kane ka la wanrah ka jingpyrshah kaba jur na ki nongshong shnong pyrshah ïa u Dolloi bad ia ka JHADC. Kane ka jingmih paidbah ka shnong Jaraiñ, kila mih sha surok ha ka 17.10.2020 na ka bynta ban ïeng pyrshah ïa ka jingleh donbor u Jemewell Pyrtuh Dolloi Elaka Amwi halor ka jingthung Acting waheh shnong ïa u Ami Tariang ha Jaraiñ khlem ka mon jong ki paidbah
U CEM ka JHADC u ma Thombor Shiwat haka jingdonlang u Finelyess Bareh EM ki la bthah ïa ki nongshong shnong ka Jaraiñ ban pan jingbit na u SDO ka Amlarem na ka bynta ban pynlong noh ïa ka jingïalang ban jied noh ia u Waheh shnong ba ki ia mon lang.
