Hadien ka jingjur jong u lapbah lapsan ha kine ki khyndiat sngi ba la dep, kala pynlong ia ki rud ki kiar jong ka Wah Myntdu ban dap da ki jakhlia ba bunjait. Kumta ki nongshong shnong ka shnong Panaliar ryngkat bad ka jingiatreilang ka Panaliar Tourism & Environmental Development Society kila iamih paidbah mynta ka sngi (29.05.2022) ban ia pynkhuid ia ki bynta jong ka wah Myntdu kiba don ha Syntu Ksiar.
Na ka liang ka shnong Panaliar ka don jingmut ban pynkhuid ia baroh ki bynta jong ka Wah Myntdu kiba hap hapoh u pud u sam jong ka shnong, hynrei mynta ka kynti kala sdang shwa tang ha ki bynta jong ka Syntu Ksiar, ka ba dei kawei na ki jaka ba khring bha ia ki nongwan jngohkai kiba na jan bad na jngai kumjuh.
Ia kane ka jingpynkhuid ia ka Wah Myntdu la lam khmat da u General Secretary ka shnong Panaliar u ma Careme Phawa ryngkat bad kiwei de ki nongkitkam shnong. Ka jingpynkhuid ka long kaba shongshit bha kaba la wan ban iashim bynta da ki spah ngut ki khun jong ka shnong kiba don ka jingkitkhlieh ban wan rah ia ka khuid ka suba hapoh ka shnong ka thaw.
Ha kane ka sngi na ka liang ka shnong Panaliar kala pynlong ruh ia ka jingaibam ia ki dohkha kiba don ha ka thwei jong ka Syntu Ksiar.
Kham ha shwa kala don ka jingialang kaba lyngkot, ha kaba u Waheh Shnong ka Panaliar u ma Riquoma Rq. Laloo ula ai khublei ia baroh ki khun jong ka shnong khamtam ia ki nongkitkam jong ka shnong kiba la iatreilang na ka por sha ka por halor ka jingbha jingmiat jong ka shnong ka thaw. Ula buh ka jingkyntu ia baroh ki nongshong shnong ban shimkhia ia kane ka bynta jong ka Wah Myntdu ban pynlong ia ka ka jaka kaba ki nongwan jngohkai pyrthei kin sngewtynnad ban wan peit kai.
Ula pyntip ruh ba ka shnong kala khang pyrshah ia kino kino kiba wan ban pyntngit ne pynjakhlia ia kane ka jaka nalor ba ka long ka jaka kaba la niew kyntang. La khang ruh ban khwai ha ka thwei jong ka Syntu Ksiar namar la dep pynlong ia ka kum ka Fish Sanctuary. Lada ka shnong kan lap ia kino kino kiba leh pyrshah ia ki kyndon ba la mana ka shnong kan sa pynshitom katkum ki kyndon aiñ jong ka shnong.
Khadduh eh u ma Riquoma ula aikhublei kyrpang ruh ka Panaliar Tourism & Environmental Development Society, ka Fishery Department, ka Soil Department bad ia kiwei de ki seng kiba ju don bynta bad ka shnong ha ka jingpynbha pynmiat ia ka Syntu Ksiar, ka jingpynneh pynsah ia ki dohum dohwah, ki sim ki doh bad ka jingpynitynnad ia ka sawdong sawkun jong ka shnong.
