Mynta ka 2 tarik u Risaw ka dei ka sngi kynmaw burom ia ka lyngkhuh sngi kha ba 155 snem jong u Mahatma Gandhi uba la tip kum u kpa ka jaid bynriew ha ri India bad ha kum kane ka sngi jan baroh ki nongshnong shnong hapoh ka ri India ki shait pynlong ia ka jingpynkhuid pynpliah ia la ki jong ki jong ki shnong ki thaw jong ki.
Ka Dorbar Shnong Mookyrdup, Jowai, West Jaintia ruh kum shi bynta ban rakhe ia kane ka sngi kala pynlong ia ka jingpynkhuid shnong, ha kaba la ia mih paidbah ban iashim bynta da ki nongshong shnong jong ka naduh ki longkmie longkpa lem bad ki samla ki khynnah.
Kane ka jingpynkhuid shnong kala sdang naduh ka por 9:00 baje mynstep. Shwa ban sdang ka la don ka jingthoh kyrteng ia baroh ki nongshong shnong kiba la poi sha ka jingpynkhuid shnong ha Dorbar Hall jong ka shnong. Ki nongshong shnong ki la ia mih ryntih bad mihkhmat u wei ne ar ngut shi ïing.
Na ka liang ki bor pyniaid shnong kila bhah da ki kynhun-kynhun ban phah leit pynkhuid ha la ki jong ki jong ki bynta, khnang ba kan pynsuk bad pynkloi ia ki nongshong shnong ban pyndep ia ka jingpynkhuid shnong.
Ka jingpynkhuid ha kane ka sngi ka kynthup ia ki surok pohshnong, ki lynti iaid kjat bad ia ki tyllong um bam umdih, nalor ka jingpynkhuid ia ki sawdong sawkun jong ka Dorbar Hall jong ka shnong, pynkut ka khubor ba la phah sha u Yutip News.
