Ki samla ki ba la pass ha ka examin Staff Nurse bad ANM ha ka 7 Risaw 2024, ki la wan ban kyntu ia ka tnad jong ka Koit ka khiah ka Sorkar Jylla ban pyndep noh kham kloi ia ka jingthungkam ha ka Jylla hadien ba kane ka tnad ka la dep ban pynmih ia ka result ha ka 28 Nailur 2024, kane ka jingdawa jong kine ki samla ka wan hadien ba kawei ka kynhun kala wan shakhmat ban dawa naka Sorkar jylla ban sangeh shwa iaka jingthepkam Staff Nurse bad ANM halor ka nongrim ba kynrum kynram halor ka jingpynmih result.
Haba kren shaki lad pathai khubor, ka Merybahun Marbaniang kala ong ba kum ki kynhun ki ba la pass iaka eksamin, ki wan ban dawa na ka Meghalaya Medical Service Recruitment Board (MMSRB) ba kan ym pynsangeh ne pynslem ban khot iaka Physical Verification ban thepkam Staff Nurse bad ANM.
U Bah Iaidshemphang Wankhar u la ong ba ka rukom thungkam kaba la pynlong da ka MMSRB ka dei kaba biang tam mynta ka kynti namar ba ki kyrtong ki iohlad ban peit ia la ki marks, haba ianujor bad ki exam ki ba la dep pynlong ha ki snem ba la dep, ki kyrtong kim don jingshai ki lah ne em ia ka exam.
U la ong ruh ba ka jingthaw ka tnad ia ka Grievances Cell ka dei ka ba biang tam namar ka ailad ia ki samla ki ba don ka jingujor halor ka exam hapoh ka 10 sngi .
Haba kylli halor ka jingpyrshah kiwei ki kynhun, u la ong “ka jingkylli hi kaba ka Board ka la buh ka dei kaba biang suda bad kum ki samla ki ba iakhun ia kane ka exam kim don kano kano ka jingujor pyrshah ia ka board , bad ka dei tang ka jingtrei shitom hi kaba lah ban pass ia kane ka exam, kumta ngi kyntu ia ka tnad ba kam dei shuh ban pynslem ia ka jingthungkam Nurse bad ANM ha ka jylla”.
Shuh shuh u la bynrap , “Ngi dei ban sngewthuh baka eksamin ka long kaba eh bha. Ngi hap iakhun napdeng 5000-6000 ngut namar ka jinglait kam ka long tang 164 tylli. Ngi kitbok iaki ba pyrshah bad ngi kyntu ba kin pynkhreh bha ban iakhun iaki eksamin hadien habud”.
” Ngi wan hangne ba ngi iakhun iala ka hok. Kumba ma ki ki don ka hok ban pyrshah ngi ruh ngi don iaka hok ban dawa pynsted ban khot noh iaka Physical Verification namar ngi la pynkhreh bha bad ngi la Passed iaka eksamin”. u la ong.