Lai tylli ki seng, kata ka Jaiñtia Women Council (JWC), United Youth Organisation (UYO) bad ka All Jaiñtia Environment Organisation (AJEO), mynta ka sngi 10.10.2024, ki la ai da ka shithi ha u Deputy Commissioner ka East Jaiñtia Hills District ban pynpaw ïa ka jingpyrshah kaba jur ïa ka jingthmu ban seng ïa ka karkhana shna dewbilat ba thymmai kaba la tip kum ka Meghatop Cement Pvt Ltd, ha ka shnong Wahiajer, Narpuh Elaka East Jaiñtia Hills District, Ki la pyrshah ruh ïa ka jingpynsngew paidbah ne ka Public Hearing ba la bun ban pynlong da ka Meghalaya State Pollution Control Board (MSPCB) ka ban long ha ka 18 tarik u mynta u bnai.
Ka jingpyrshah jong ki ka long kaba la pynshong nongrim kiuba iadei bad ka jingshah ktah jong ki sawdong sawkun jong ka mariang. Da kaba ong ba kumba long mynta ki don haduh shiphew tylli ki karkhana shna cement kiba treikam ha ka thaiñ Elaka Narpuh jong ka East Jaintia Hills District, kiba la pynmih shibun ka lyer basniew bad kiwei de ki jingktah ia ka maraing, kaba ktah jur ia ki um ki wah kiba don ha ka thaiñ kum ka wah Lunar bad ka wah Lukha. Kane ka thaiñ ka don ruh ia ki jaka kum ka Narpuh Reserved Forest bad wildlife sanctuaries. Ka jingseng ia kawei pat ka karkhana kan pynjur shuh shuh ia ki jingshah ktah jong ka mariangn. Ki nongshong shnong ki la mad lypa ïa ki jingma ha ka koit ka khiah namar ka jingsawa bad ka jingjaboh ka lyer na ki karkhana kiba la don lypa, katba ka jingjaboh jong ki wah ka buh jingma ïa ka jingim briew bad mrad.
“Ngi kyntu ia ka sorkar ba kan leh da kaba tyngeh pyrshah ia kine ki karkhana lada kim ai kam ai jam 100% ia ki samla trai jaka ne ka thaiñ bad ban weng ia ka jingbuh dor kaba heh ia ka dewbilat hapoh ka distrik”, la ong ka shithi ki lai seng.