Ka Movement For Change (MFC), Meghalaya India kawei naki kynhun treimon sngewbha kaba na Jaiñtia Hills ka kyrshan pura ïaka jingdawa ban pynrung ïaka ktien Jaiñtia lane ka ktien Pnar haka Meghalaya Anthem.
Kat kum ka kyrwoh bala phah da U Pherdian Samayang kum u President bad u C. Sungoh kum u nongaiktien jong kane ka Movement ki ong ba ka jingdawa ban pynrung ïaka ktien Jaiñtia lane ktien Pnar haka Meghalaya Anthem ka long kaba shong nia shong nongrim bad kaba dei hok.
Ka ktien Pnar Jaiñtia ka dei ban kynthup lang haka Meghalaya Anthem namar naduh hyndai hynthai kulong kumah ngi ki nong Jaiñtia ïa kiba la tip kum ki Pnar ngi don laki jong ki Syiem bad ki Hima.
Kum ki Syiem Madur Syiem Maskut, Sajar Nangli , Syiem Latympang bad kiwei kiwei de. Naduh bala tip jingkheiñ ïaka jingshem ïaka Hima Jaiñtia haka snem 1500 A.D naduh u Syiem Parbat Ray ter ter haduh u Syiem Rajendra Singh haka snem 1835 ngi don laki jong ki Syiem kiba ngi tip kum ki Syiem Jaiñtia kiba ki juh khot daka ktien dkhar Jaiñtiapur.
Kaba ka Hima jong ki ka heh bad ka ïar naduh Wah Umngot shaduh wah Umïam sha sepngi bad kawei ka rithor Sylhet shapoh Bangladesh baroh ka Karbi Anglong District bad shiteng jong ka Dimahasoa District.
Haka por jong ka sorkar Phareng ruh ym shym la pynhap ïa ngi shapoh Khasi hynrei ki pynlong ïangi laka jong ka jaka treikam kaba ngi tip kum ka Jowai Civil Subdivision.
Haka por ba ka Indira Gandhi ka wan pynbna State ïaka Meghalaya ruh kala kren shai ba la ai state ïaka Meghalaya halor ki lai kynhun ki jaitbynriew kita ki Khasi Jaiñtia bad Garo. Ïaka ri jong ngi la tip kum ka ri Khasi Jaiñtia bad ka ri Laiphew Syiem bad Khadar Dolloi, Laiphew Syiem kamut ïaka ri Khasi bad khad-ar Dolloi kamut ïaka ri Jaiñtia.
Nalor kane ngi don ruh laka jong ka District Councils ban pynshisha ba ngi don laka jong ka Jaitbynriew laka jong ka ktien ka thylliej bad ka riti ka dustur dei halor kane ka nongrim bad ka jingshisha ngi dawa baka ktien Pnar Jaiñtia kadei ban rung haka State Anthem jong ka Meghalaya.
Ka Movement ka ong ruh ba kane ka jingdawa jong ngi kam dei ban pharia jaitbynriew khamtam hapdeng ki Khasi bad Jaiñtia hynrei kalong pynban ban wanrah ïaka jingtylli jingryntih bad ban pynkhlaiñ ïaka jaitbynriew. Kat kum ka jingong naki ba bun, ba lada pynrung ïaka ktien Pnar Jaiñtia te dei ban pynrung saka ktien Biate Karbi War Maram Bhoi Lyngngam bad kumta ter ter.
Hynrei kum ka jaitbynriew ngi dei ban sngewthuh pat ïaka jingiapher hapdeng ki Main-tribe bad ki Sub-tribe. Kum ka nuksa hangne ha Jaiñtia Hills ki Biate ki Karbi ki War ki Labang Nangphyllut bad kiwei kiwei de ki dei tang ki Sub-tribe jong ka jaitbynriew Pnar bad ngi dei ruh ban sngewthuh ïaka jingïapher hapdeng ka ktien pdeng jong ka Jaitbynriew bad kita ki ktien shnong kiba ngi tip kum ki Local dialects. Kumba shim ïaka ktien Khasi Sohra kum ka ktien pdeng jong ki Khasi bad ka ktien Jowai (Jwai) jong ki Pnar.
U Chief Minister Conrad Sangma u ong ba la shna bad pdiang ïaka Meghalaya Anthem kat kum ki kyndon aiñ namar ba latip ïaka ktien Phareng Khasi bad Garo kum ka State Official Language. Halor kane ka Movement ka ong ba lada kumne dei ban pynrung saka ktien Pnar Jaiñtia ban long ka Official Language jong ka jylla.
Ka Movement ka pynshai ruh baka jingdawa ban pynrung ïaka ktien Pnar Jaiñtia haka Meghalaya Anthem kam mut ban pyntlot ïaka jingdawa ban pynrung ïaka ktien Khasi haka khyrnit kaba phra jong ka Riti Synshar jong ka ri India, bad kum ka Movement ka ai ka jingkyrshan bad jingïatrei lang halor kane ka kam.