Ki nongtrei Muster Roll hapoh ka lama jong ka All Jaiñtia Muster Roll Workers & Labour Union (CEC) Jowai, hynin ka sngi kila leit mih sha ka ophis u Executive Engineer ka PHE (Electrical) Jowai bad kumjuh sha ka ophis ka Executive Engineer ka PHE (RWS) Jowai ban leit pynsngew ïa ka jingeh jong ki halor ka jingduh tulop jong ki kaba la kynjoh sha ka lai bnai kata naduh u September-November 2023.
Na ka liang ki nongïalam jong ka AJMRW&LU (CEC) Jowai, hapoh ka jinglam khmat jong u Adviser ma K.L. Pariat lem bad ki nongkitkam ka seng kila ïoh lad ban ïakren bad kitei ki ar ngut ki EE jong ka tnad PHE ba kin pyrshang katba lah ban siew noh ïa ka bainong jong ki hapoh jong une hi u bnai hashwa ban poi ka aiom lehkmen Christmas bad New Year. U ma K.L. Pariat ha ka jingkren sha ki lad pathai khubor ula ong ba ka Chief Engineer jong ka thad PHE kam shem la pyntreikam ïa ki mat jingdawa kata ban ïoh ïa ka bainong kaba manla u bnai, haduh ba la pynlong ïa ki mynta ka sngi ban mih surok ha ryngkat ki jingpyrta.
U ma Pariat ula pynsngew “wat na ka liang u myntri rangbah ula dep kular ba ka sorkar kala dep pynkhreh lypa ka bainong ki nongtrei bylla sngi kaba lai bnai” hynrei kam shem treikam, ha kaba ïadei bad ka RCW kiba bun ki tnad treikam kila dep pynytreikam katba ka tnad PHE kam shem la pyntreikam ïa katei ka hukum jong ka sorkar.
Ha ka liang ka Building and other Construction Welfare Board kaba hap hapoh ka Labour Department kaba peit ïa ki nongtrei bylla hapoh ka PHE bad ka tnad PWD, hynrei na ka liang ka tnad PHE ka klem ai lad ïa ki nongtrei ban long ki member hapoh katei ka Welfare Board khnang ba kin ïoh jingïarap na katei ka skim.
Shuh shuh ula ong na ka bynta kito Muster Roll kiba la trei 5 snem shaneng la dei ban pynkiew kyrdan na ka unskill sha ka semi Skill katba ha PHE kam shem la pyntreikam. U ma Pariat ula kren shai lada ka sorkar kam lah ban siew ïa katei ka pisa hashwa ka Christmas kata hapoh ka 17 tarik mynta u bnai, na ka liang jong ki kim banse shuh ban kiew sha Shillong ban pynlong ïa ka jingiakhih kaba jur naduh ka 18 tarik u Nohprah namar ka jingmynthi palat jong ka sorkar.
Kumba long mynta ki Muster Roll hapoh ka tnad Sericulture Department West Jaiñtia haduh 6 bnai kim pat ïoh tulop, na Water Resources ki nongtrei MR kila duh tulop naduh u bnai April-November hynrei kitei ki nongtrei ki dang leit trei beit haduh mynta. Kumta u kyntu ïa u Myntri Rangbah ka jylla ba un hukum ban pyntreikam noh mardor ïa kane.
