Ka Mawlai SC ka la ioh ia ka jingjop don burom da 11-0 hynne ka sngi ha ka jingiakhun pyrshah ia ka Pynursla United YC kaba dei ruh ka jingialehkai ba 2 mynta ka samoi na ka bynta ka lympung Meghalaya State League (MSL).
Ka Mawlai ka la pynpaw ia ka jingradbah bad ka jingtbit da ka jingjop kput ha baroh 2 tylli ki jingïalehkai ba la dep. U Khrawkupar Jana u dei u rangialehkai ba kongsan ha kane ka sngi ha kaba u la ioh ban thep haduh 6 kol marwei. Lah ban pynkynmaw ruh ba u Khrawkupar u la thep 4 kol ha ka jingialehkai ba nyngkong bad lyngba kitei ki kol, mynta u la ioh 10 kol. Ka jingtbit jong u Khrawkupar ha kane ka samoi ka la pyntikna ba un khur ia ka khusnam golden boot khlem artatien.
Ia ka kol ba nyngkong u la ioh ban thep lyngba ka penalty, kata ha ka minit ba 27 katba ia kiwei pat ki kol la ioh ban thep ha ka minit ba 32, 44, 64 69 bad 79. Ia ki 5 kol la ioh ban thep da u Reformer Pale ha ka minit ba 9, u Arkibor Makhroh ha ka minit ba 11 bad 70, u Wanboklang Lyngkhoi ha ka minit ba 25 bad u Samlang Rympei ha ka minit ba 52.
Haba phai pat ha ka jingiakhun jong ka group D, ka Rangdajied ka la pynliem ia ka Mulait United da 2-1. Ia kitei ki kol la ioh ban thep da u Pasborlang Khonglikong ha ka minit ba 29 bad shwa ban kut ka minit ialehkai, kata ha ka 90+4 la ioh ban thep da u Owanijuh Pajuh.
Ka jingiakhun na ka bynta lashai ka sngi (2 Risaw 2024) jong kane ka lympung ba la pyniaid da ka Meghalaya Football Association (MFA) kan long hapdeng ka Shillong Lajong pyrshah ia ka Mawtari Myrdon ha Wahiajer, por 2 baje nohphai sngi.