Ka North Eastern Hills University Student Union (NEHUSU) bad ka North Eastern Hills University Teachers Association (NEHUTA )mynta ka sngi ka 25 tarik Naiwieng 2024 da kawei ka sur ki la mynjur ban khanglad ia u Vice Chancellor u Prof. Prabha Shankar Shukla ban wanphai biang sha katei ka skulbah, khlem da khein ia kaei kaba mih na ka kaiphod na ka komiti kaba don arngut kaba la thaw da ka tnad pule puthi.
Haba ïakren bad ki lad pathai khubor, u President ka NEHUTA u Prof. Lakhon Kma u la pynpaw ba wat ka Mawlai Town Dorbar ruh ka la rai ban khanglad ïa u VC ban rung sha katei ka jaka pule jong ka skulbah, kaba hap hapoh ka jingpeit jong ka. U la ban jur ba ka NEHUTA, ka NEHUSU, bad ka North Eastern Hills University Non teaching Staff ki la pyntip ïa u Prof Shankar Shukla ban nym ia trei lang shuh.
Ha kajuh ka kyrwoh, u President ka NEHUSU u samla Sandy Sohtun u la pynpaw ia ka jingsngewskhem ba ka kaiphod na ka komiti kan kyrshan ia ka nongrim jong ki. U la pynshai ba ki dang sngap ha ka rai jong ki ban khanglad ïa ka jingwanphai biang jong u VC bad ki sngewkmen ïa ka jingmih jong ka jingïalang, namar ki dkhot jong ka komiti ki la ai ka jingsngap kaba sbun ïa ki jingeh jong ki.
Kane ka komiti kaba kynthup ïa u Chairman barim ka UGC u Prof. DP Singh bad u Vice Chancellor barim ka Assam University u Prof.Dilip Chandra Nath.
