Ka Khasi Hills Autonomous District Council (KHADC) mynta ka sngi ka 24 tarik Risaw ka la pyntip paidbah sha ki lad pathai khubor ba na ka liang u ka ophis u Lat ka jylla u Ch Vijayashankar u la mynjur ia katto katne tylli ki bill jong ka Council.
Haba kren sha ki lad pathai khubor mynta ka sngi na ka liang u Bah Pyniaid Sing Syiem Cem ka KHADC u la ong ba na ki 7 tylli ki bill kiba la dep phah sha u lat ka jylla, ki don katto katne tylli ki bill kiba la mynjur da u Lat ka jylla.
“Ka bill ba nyngkong ka dei ka Khasi Hills Autonomous District Administration of Elaka 2nd amendment Bill 2023 kane ka bill ka la kylla aiñ bad ka jingmyntoi na kane ka bill ka long ba ha ka elaka administration amendment ka long ba la lah ban pynrung ia ki seng samla bad ki seng kynthei ne ki seng longkmie ha kane ka bill, la batai shai nalor ka jingtreikam jong ki Dorbar Shnong lane ki shnong bapher bapher hapoh ri Khasi ba hap ha ka jingpeit jong ka KHADC ba ka jingtreikam jong ki Dorbar Shnong kam long kaba thylli da ka jingithuh jong ka aiñ ia kine ki ar tylli ki kynhun ia ki seng samla bad ki seng longkmie mynta la ithuh da ka aiñ. Ngi ai khublei kyrpang ia ka ophis DCA ka sorkar jylla bad ka ophis jong u Lat ba la mynjur kyrpang ia katto katne ki bill.
Kawei pat ka bill ba la tip kum ka Khasi Hills Autonomous District Nominations and Election of Myntri Lyngdoh Raid Sordar and Administration of Sohiong Lyngdoh bill 2023. Ha ka jingpeit jong ka KHADC don kumba 54 tylli ki elaka lane ki hima kiba bun bha kine ki elaka ki hima ki treikam ha la ki jong ki hima namar ka nongrim jong ka sixth schedule ka batai shai ba ia ki MDC ba la thung ban pynskhem bad aibor shuh shuh ia kaei kaba la hikai naduh ki longshwa manshwa khamtam haba iadei bad ka synshar khadar ka jingbym don ia ka aiñ ha ka iit ka hima ka wanrah bun bha ka jingdkoh ha ka treikam treikjam. Kane ruh ka dei kawei ka bill ba la mynjur ban wanrah ryntih ha ka rukom treikam ha ki shnong bapher bapher.
Ka bill ba lai ka dei ka Khasi Hills Autonomous District Regulation Administration of land rule 2023 ia ka land act la dep ban mynjur haba iadei bad ka land rules la dep phah bad mynta la dep ban mynjur. Ka jingmyntoi ba ngi ioh ia kane ka land rules ka long ba hadien ba ngi la ioh ia ka land registration land act ka jong ngi na ka liang ki paidbah kan long ka jingshngaiñ bad suk khamtam ban buh jingthoh lane register ia ki jaka lane ki nongrim ïng lane ki kper ne ki jaka rep mynta ki lah ban pynskhem ban long trai da kaba wan sha KHADC ban register bad ynda la ioh ia ki kot baroh ngin sa ai ia ka certificate ka hok long trai ia kino kino kiba la register. Ngi lah ban pysngew shuh shuh haba iadei bad ki riewshimet kiba don jaka kiba buh bynda ban ioh ram ban shna ïing ne kano kano ka ram ban khaii pateng da kaba buh bynda ia ki jaka puta bad don jingithuh da ki Bank. Hadien ba la ioh jingmynjur ia kane la land act bad land rule la ioh jingithuh bad kan long ka jingkyrkhu ia ki nongshong shnong.
Ngi la ioh jingmynjur ruh ia ka United Khasi Jaintia Fishery Amendment bill 2023 kane ka fishery ka la don lypa bad mynta kane ruh la ioh jingmynjur.
Ka jingmyntoi jong kane ka bill ka long ba la aibor ia ka District Council ban khmih ia ki wah hapoh ri Khasi jong ngi ba ngin iada ia ki doh um dohkha ha kane ka act la batai shai ba dei ka District Council kaba peit ha kane ka amendment la don katto katne ki jingkylla ha ka kyndon wat ia kine kiba pynlong ia ka jingkhwai lane ka competition ne jingiakhun la hap ban peit da ka District Council bad ngin don da ka jingsngewthuh jingmut bad ka District Administration ban ai ia ka jingbit haba iadei bad kane ka jingiakop khwai dohkha.
Sa ka wei ka Bill ka Khasi Social Custom Lineage Amendment Bill 2023 kane ka dei kawei ka bill kaba kongsan bha ka ktah ia u budlum jong ka jaidbynriew namar ha kane ka bill ka lah ban ithuh ia ki kur ki jait ha ri Khasi jong ngi.