Na ka jingther u slap ha ki ar sngi lynter, ki 3 tylli ki District ha Garo Hills ki ba kynthup ia ka West Garo Hills, ka South West Garo Hills bad ka South Garo Hills ka la shah ktah jur, na ka jingshlei ka um, ka jingwan ka khyndew bad ka jingmynsaw bad duh ia ka jingim briew .
Katkum ka kyrwoh ba la phah da ki bor sorkar la iathuh ba 3 tylli ki District na Garo Hills, 17 tylli ki shnong ki la shah ktah jur, Kiwei ka iing bad Kiwei ka PHC ka la julor, 3 ngut ki briew ki la duh ei ia ka jingim, bad 3 ngut ki briew ki la mynsaw jur.
Ki 3 ngut ki briew ki ba la khlad ha ka jingtwa ka khyndew ki kynthup ia ka Santa N Marak 57 snem ka rta , kaba na ka shnong Kuinabui, i Heprit Mairdo P Marak 5 snem ka rta na ka shnong Sorokpara bad ka Sarika M Marak 18 snem ka rta na ka shnong kharongngre West Garo Hills District.
Kiba mynsaw ki kynthup ia ka Moralistic N Marak na Kuinabui, West Garo Hills, ka Parcella A Sangma, bad u Fedrik A Sangma na ka shnong Northern Hawkhana kine baroh lai ngut ki don ha Hospital ban ioh ia ka jingsumar.
Na ka liang ka SDRT ka la hiar sha kine ki District ban ai ka jingiarap ha ryngkat ka jingiatrei lang ka NDRF Guwahati bad kumjuh la phah ruh ia ki SDRF na Shillong la pyntreikam ruh ia ka tnad ka Civil Defence, ki pulit, ka F&ES Municipal Board.
La pyntip ruh halor la jinglong jingman, da kaba kdew ba ia jingtwa khyndew ha Tura la lah ban tehlakam , kawei ka kynhun jong ki SDRF na Tura, ki don ha lynti ban leit sha Dalu hynrei ki sahkut haka jingtwa khyndew. Ka surok ka dang iaid bad tang shu dep, ka kynhun kan leit sha Dalu ban pynkloi ka jingiarap .
Ki kaiphod ba la ioh pdiang ha Tura SDRF Division HQ, na SGH District ba kawei ka PHC ha Silkigre ka la shah tap ha ka um, na ka liang u BDO Chokpot u la pynthikna ba ki surok sha Silkigre ki long ki bym long ban iaid mynta. Ki nongtrei bad ki briew kiba sahkut ha katei ka PHC la lah ban ai jingiarap da ki trai shnong. Kawei ka kynhun SDRF na Divisional HQ Garo Hills ki la don ha ka lynti hynrei la ai jingmut ba kin sangeh shwa ban hiar sha kane ka jaka tad haduh ban kham duna ka um.
La phah ia kawei ka team SDRF na Shillong ban ai ka jingiarap ia ka SDRF Tura, ki SDRF jong ka Shillong mynta ki don ha ka jingpahara kaba khlem sangeh (24/7) bad ki don 3 tylli ki kynhun na Shillong HQ.
