Ym lah ban len ba ka jingioh ia ka surok ‘Intermediate’ na Nongstoin sha Wahkaji kadei ka jingkyrkhu kaba khraw na ka bynta ka thaiñ Langrin bad Warsanlyngdoh, kata naduh Nongstoin ter ter sha Rangblang, Myriem, Umdohlun Wahkaji bad kiwei kiwei ki shnong ba marjan namar ha shwa ban ioh ia kane ka surok, da ki phew snem ki briew jong katei ka thaiñ ki mad jingeh shibun namar ka jingbym don ia ka surok kaba bha bad la don katto katne kiba la mad ia ka jingsngewsih namar ka jingduh noh ia ki mynsiem ba kordor na ka jingsniew palat ka surok bad ka shem jingeh ia ki kali ban iaid khamtam ha ka por lyiur.
Naduh ba la ioh ia kane ka surok, ki nongshong shnong ki sngewthuh shisha ka long ka jingmyntoi watla ka jingtrei ka dang iaid mynta hynrei namar ba la ioh ia ka surok ba bha ha ka sien ba nyngkong, don katto katne ki bym pyrkhat shuh ia ka jingmynsaw bad la shu ñiah khlem da pyrkhat shuh na ka bynta ki briew kiba don hapoh kali.
Ha kaba iadei bad kane ka khubor, mynta ka sngi ka 4 tarik Naitung, kawei ka kali kit mar ka la kum noh sha riat hajan Photjyrhap, Rangblang bad katkum ka jingiakren bad ki nongshong shnong la ong ba ka jingjia ka dei na ka jingpynher sted ia ka kali.
Ha ka jingioh iakren bad u Bah Fulstar Lyngdoh, uwei na ki nongshong shnong jong ka shnong Wahkaji u la ong “manshwa ngi mad jingeh bym don surok hynrei mynta jynjar ba la don surok namar ba ki briew ki la leh sting bad niah khlem akor bad nga itieng ban iohi lada long haduh katne namar ngi la ioh surok ba bha” u la ong ruh ba lada ki briew ki ñiah shongshit kumto bad poi haduh ka jingmynsaw ka bha ban mad jingeh bad khlem surok biang kum mynshwa.
Kum ban shu pynkynmaw ha ka 2 tarik Rymphang 2021, ka sorkar Meghalaya hapoh ka jingialam jong u Myntri Rangbah Conrad K.Sangma, la pynbna ban shna ia kane ka surok lyngba ka skhim SARDPNE bad ka mang tyngka kaba long 270 klur.
