Mynta ka step ki Pulit jong ka Lumshnong ha ka jingtalasi ia ki kali Night Super Bus ba iaid lyngba u surokbah NH-6 kila ioh ban bat ia ki lai ngut ki briew na ki ar tylli ki Bus kiba dang wan na Silchar ban leit sha Guwahati.
Ha kane ka jingtalasi ki Pulit ka Lumshnong kila ioh ban kurup ia 40 tylli ki synduk buh sabon kiba don ia u drug Heroin uba shongdor haduh T.3.6 klur tyngka. Nalor kine la kurup ruh ia u kanja ba khia haduh 9.031 kgs bad la bat ruh ia ki 4 tylli ki mobile phone jong kitei ki briew.
Kine ki briew kiba la shah kem ki kynthup ia u Amzad Hussain Laskar, 18 snem na ka shnong Rajnagar, Cachar District, Assam, u Monib Hussain basker, 18 snem na ka shnong Bangram, Cachar District, Assam bad u Chamir Hussain Barbhuiya na Isalamabad, Silchar, Cachar District Assam. Ia kine baroh lai ngut la register case ia ki hapoh ka kyndon aiñ NDPS.
Kum ban shu pynkynmaw ba kane ka dei kawei na ki 5 tylli ki jingiohkem drug bad kiwei de ki jingdih pynbuaid ba bun eh hapoh kine ki 10 sngi hapoh East Jaiñtia Hills.
Haba kheiñlang ia ka jingiohkem da ki Pulit ka East Jaiñtia Hills District hapoh kine ki 10 sngi kala kot shaduh ka T.15 klur tyngka ong ka khubor Pulit.