U Myntri Sorkar jylla u Bah Paul Lyngdoh mynta ka sngi ka 24 tarik Naitung 2025 haba kren sha ki lad pathai khubor halor ka jingpynkynriah ia ki nongdie madan na Khyndailad sha MUDA Parking Lot.
U la pynpaw ka long ka jingjop bad ka jingpyrshang jong ka sorkar ban pynkylluid ia ka Khyndailad, kaba dei ka jaka khaiï kaba heh tam ha kane ka nongbah Shillong, ha kaba ha kine ki 2 snem ka jingpyrshang jong ka sorkar ka ka tnad Urban Affairs, ka Shillong Municipal Board bad ki bor pyniaid District.
Shuh shuh haba batai lyngkot ia kane u la bynrap ka la don ka survey ia kine ki nongdie madan kiba don kumba 1400 ngut ia kiba la kynthup ha ka survey bad ka tnad Urban Affairs jong ka sorkar jylla ka la buh ha khmat eh ia ka thong ban pynkynriah ia ki nongdie madan na ka jaka kaba ki shait shnong sha ka jaka kaba thymmai hapoh MUDA Parking Lot, kaba long hapoh jong ka Meghalaya Street Vendors Protection of Livelihood, & Regulation of Street Vending Scheme 2023 (MSVPOLRSV).
Shuh shuh u la bynrap hapoh jong kane ka jingpyrshang na ka 1400 ngut ki street Vendors tang 407 ngut kiba pyndep ia ka kyndon jong ka aiñ bad ban ioh ia ka syrnot – Certificate of Vending (COV) bad na kine ki 407 ngut, 311 ngut kiba la wan shim ia kane ka Certificate of Vending (COV).
Ka tnad Urban Affairs bad ka ophis jong ka DC ki la pyndep ban ai jaka ia kine ki nongdie ha ka mala kaba nyngkong jong ka MUDA Parking Lot.
U Bah Paul u la pyntip ban plie lad plie lynti ia ka jingpynkynriah ia kine ki nongdie madan, la shna 365 tylli ki stall bad haduh mynta 282 ngut kiba la shong ha kitei ki stall, kiba ka shillong Municipal ka la pynkhalai nusip da ki number sha kine ki nongdie madan.
Nalor ki dukan die jingdie, kaba ka sorkar ka la pynshna kan ai ruh ia ka jingsiew kaba 10,000 hajar tyngka marwei sha kine ki nongdie madan bad ka allowance kaba 2000 hajar shibnai ha ki 5 bnai.
U la pyntip ba kane ka jingweng ia ka jingkhapniah ia ki nongdie madan, ngin bteng ruh ha kiwei kiwei ki bynta jong ka sor bad ban pyntikna ba baroh kiba la shonghok kiba la dep registered, ngin pynkynriah ha ki jaka kiba ka sorkar ka la dep pyntip bad pynshai.
Haba iadei bad ka jingkylli na ka 1400 ngut kiba ioh ki long tang 407 ngut. U bah Paul u la pyntip na ka 1400 ngut kiba ioh ki long tang 407 ngut bad na kine kiba khlem ioh kim don jaka ia ki, namar kine kiba ioh ki dei ban pynshisha ba ki la shong la sah ha Meghalaya 3 snem ha shwa jong ka Survey bad kine kiba khlem ioh ia ka COV ki dei kiba la fail shwa ha kata ka liang, kaba ar ki dei ban don lypa ka kam khaïi pateng ha ka juh ka jaka 6 bnai shwa ka survey bad ka sorkar ka la ai ia kine ki kyndon bad kiba pyndep ia kine ki kyndon ki dei 407 ngut na ka 1400 ngut, bad ki bym pyndep ia kine ki kyndon ka sorkar ka khlem kheiñ ia ki la pyntip u Bah Paul Lyngdoh.
Ka sorkar ka iaid katkum ki kyndon, katkum ka Scheme Protection of Livelihood & Regulations of scheme & Vending Scheme 2023 bad tang kiba pyndep ia kane ki kyndon ka sorkar ka ithuh ia ki la pyntip u Bah Paul Lyngdoh.
