-Ai Jingkyrshan pura ka 8-Shnong Aquatic Life Environment Protection Council-
Ka “8-Shnong Aquatic Life Environment Protection Council” East Jaintia Hills District ka ai ka jingkyrshan ba pura ia ka jingphah tohkit u Deputy Commissioner ka East Jaintia Hills District, ha u Superintendent of Fisheries Department, Khliehriat halor ka jingiai iap ki doh um ba don ha wah Prang ka ba iai jia na ka por sha ka por ha man la u snem tang shu wan poi u slap thymmai jong ka Aiom lyiur, kane ka jingphah tohkit jong u Deputy Commissioner ka long ha dien ka jingujor u samla Andrias Talang, ba dei u Samla pule Aiñ (LAW) hapoh ka skul bah North-Eastern Hill University, Shillong.
U samla Andrias u la dawa ba dei ban tohkit bniah ha ka ba iadei bad ka jingiap ki doh um ha katei wah namar ba ha katei ka wah bun na ki nong shong shnong jong katei ka thaiñ ba khynthup naduh ka shnong Lama, Borghat, Hingaria bad kiwei kiwei de ki shnong ba don ha ka tei ka thain Border jong ka East Jaintia Hills District ki im ja da ka ba khwai bad tong doh na katei ka wah.
Kumta kum ka jingsngew khia ba ioh lehse ba kitei ki doh um ha ka tei ka wah ki lah ban don bih ne bymbit ban bam kumta u samla Andrias Talang, da ka jing kitkhlieh na ka bynta ka koit ka khiah jong ki para nongshong shnong jong ka tei ka thaiñ u dawa na u Deputy Commissioner ban phah tohkit bniah ia ka tyllong jong ka jingiap jong ki doh um na katei ka wah bad ban wad bniah halor ka tei ka jingjia ioh lehse ba kine doh um ki long ki ba ymbit ban bam.
Halor kane ka mat ka 8-Shnong Aquatic Life Environment Protection Council, ka ai ka jingkhublei bad ka jingkyrshan pura ia u samla Andrias Talang, ba u lah shimkhia ia kane ka mat ha kaba ka Council ruh ka don ka juh ka thong ban pynneh pynsah ia kane ka wah, namar lah ban ong hangne ba dei tang kane ka wah hapoh East Jaintia kaba ki doh um ki dang im wat la ka don ka jingiap jong ki ha man la u snem ha ka por ba wan u slap nyngkong jong ka aiom lyiur hynrei ki paidbah ki dang iohlad hi ban wan khwai pynngad namar ki doh um ba im ha kane ka wah ki wan kiew biang na Ri thor Bangladesh sha katei ka wah ynda lah kham heh ka um na katei ka wah bad blat ki kynja bih.
Kumta na ka liang ka Council ka kyrpad ia ki nongshong shnong jong kane ka thaiñ ba kin sngewbha ban iai shah shipor katba ka report tohkit bniah jong ka Fisheries Department kam pat mih ba kim dei ban khwai ne tong doh na kane ka wah ioh lehse kan wanrah ki jingma ha ka koit ka khiah jong ki da kaba ki bam ia kine ki doh um ba don ha kane ka wah, bad ha ka juh ka por ka council ka la rai ba kan iai buddien ia kane ka jingjia bad ki bor Sorkar ba halor khnang ban lah ban iada ia kane ka wah bad ba kan iailong kumba ka long ha ki por mynshwa, ha kaba ki paidbah jong kane ka thaiñ bad kiba na kylleng ki thaiñ jong ka rillum Jaintia ki ba ju shait sngew tynnad ban wan kwai pyngnad na ka por sha ka por ha ki aiom khwai bad khamtam kito ki ba im ja kpoh da kaba khwai bad tong doh na kane ka wah.
Kane ka long katkum ka kyrwoh na u Johnmiki Pala, General Secretary bad Samson Lamin Publicity Secretary 8-Shnong Aquatic Life Environment Protection Council.
