Ka Dorbar Shnong Umshaken ryngkat bad ka Synjuk ki Rangbah Shnong Raid Mathan ha ryngkat ki nongshong shnong jong ka Raid Mathan Ri Bhoi District, ha ryngkat ka jingsynran lang ka Kong Rona Khymdeit MDC ka Nongpoh Constituency, U Bah S. Nongkseh Chairman Synjuk Rangbah Shnong Raid Mathan ha ka 3 tarik Naiiwieng 2025 ki la thmu ban wan kynduh ia u Myntri ka tnad ka koit ka khiah u Ma Wailadmiki Shylla, hynrei da ka jingbym don jong u Myntri, ki la shu ai noh da ka jingthoh sha ka ophis u Myntri ka tnad ka koit ka khiah ban buddien halor ka jingdawa ka Dorbar Shnong Umshaken ban kyntiew kyrdan noh ïa ka Umshaken Health & Wellness Centre (HWC) sha ka Public Health Centre (PHC).
Haba kren sha ki lad pathai khubor na ka liang ka kong Rona Khymdeit ha ryngkat bad ki Synjuk Rangbah Shnong ka Raid Mathan ki la buh ka jingkyrpad ia ka sorkar lyngba u Myntri ka tnad ka koit ka khiah ban kyntiew kyrdan noh ia ka Umshaken Health Centre sha ka Primary Health Centre. Ka Kong Rona Khymdeit ka la ong ba ka Umshaken Health Centre ka la don naduh ki snem 80 bad ka jingkylla kaba bun ki nongshong shnong ki la roi bad ki jingdonkam ruh kiba bun kiba donkam ha katei ka jaka Sumar.
Kumta na ka liang ka Synjuk Ki Rangbah shnong ha ryngkat bad ka MDC Nongpoh ki buh ka jingkyrpad ban kyntiew kyrdan noh ia katei ka jaka ai jingsumar sha ka Primary Health Centre.
Na ka liang u Secretary Synjuk Rangbah shnong Raid Mathan u bah Dividian Mangu u la ong ba Ka Raid Mathan ka la mang na ka bynta ka jaka ban buh ia ka Primary Health Centre namar ki paidbah katei ka thain ki kynduh shibun ki jingeh khamtam haba iadei bad ki longkmie kiba armet, bad kumta na ka liang ka Raid Mathan ka buh ka jingkyrpad ia ka Sorkar ba kan ai noh ia ka jingdonkam jong ka Raid Mathan haba iadei bad ka jingdonkam ia ka jingsumar ban kyntiew kyrdan noh ia ka Umshaken sha ka PHC bad kumjuh ban shna pynbha ia ki building bad kumjuh ban wanrah ia ka Ambulance khnang ban suk ki paidbah nongshong shnong jong ka Raid Mathan.
