Ka jingïalehkai phutbol jong ki khynnah skul ne ka ‘Inter School Subroto Cup Football Tournament- 2022’ bala pynïaid da ka ophis u District Sports Officer West Jaiñtia Hills District, Jowai kaba la long mynta ka sngi ha madan Kiang Nangbah Stadium, Jowai, la ioh i ba ki skul na nongkyndong ki kham khlain bad tbit ban ia kiba hapoh sor Jowai.
Mynta ka sngi ka ophis DSO kala ioh ban pyniakhun haduh 6 game, na kine ki don lai tylli ki skul napoh sor bad 9 tylli pat ki skul ki dei na khapsor bad na nongkyndong.
Ha ka jingïalehkai Under-17 ki khynnah shynrang mynta ka sngi ka jingïakhun ba nyngkong ka long hapdeng ka ka Modern Secondary School Ialong pyrshah ia ka Amwi Jarain Secondary School, ha kaba ka Amwi Jarain Secondary School kala jop da 4-2 kol ïa ka Modern Secondary School lyngba ka Tie Breaker. Ka jingiakhun kaba ar ka Marian H/S School kala jop da 2-0 kol ïa ka Riwar Jaiñtia Church of God SS, Amlarem. Ka jingiakhun kaba lai ka Adventist H/S School kala jop haduh 5-0 kol ïa ka Mang Hai Ryum SS Amlarem.
Ka jingiakhun kaba saw ka Sawlyngdoh H/S School Mowkaiaw kala jop da 4-0 kol ïa ka Khimusniang Presbyterian S/S. Ka jingiakhun kaba san ka St. Claret SS Phramer kala jop da 5-1 kol ïa ka Tpep-Pale SS. Katba ha ka jingiakhun kaba hynriew ka Lumpyrtuh SS Mihmyntdu ka la jop ia ka Syiem Jingsuk SS Amlarem da 3-1 kol lyngba ka Tie Breaker.