Ka Hynñiewtrep Border Dispute Redressal Forum (HBDRF) bad ka Kong Banikas Laban mynta ka sngi 28 tarik kila leit ban ai da ka dorkhas ha u Deputy Commissioner jong ka West Jaiñtia Hills District na ka bynta ban ïakren bad ki bor District jong ka West Karbi Anglong kynthup ïa u DC bad SP ban weng noh ïa ka ejahar ba la mudui pyrshah ïa i kong Banikas Laban da ki pait Karbi ha Jrikyndeng Police Station.
Ym lah ban tip mano ba soi bad mynno ba la ujor ïakane ka ejahar, hynrei la ïoh jingtip lyngba ki lad pathai khubor na Karbi Anglong halor kane ka kam bad la ïoh jingtip ruh lyngba ka phone call na u Officer Incharge ka Jrikyndeng Police Station ba la received ïa kane ka ejahar pyrshah ïa i bad ynda i ne i kong i la pyrshang ban kylli bniah halor kane ka ejahar te une u OC u pyndam noh ïa ka phone jong u bad ynda call ruh um juh shim shuh.
Ki paid Karbi ki kam ba ka shnong Mowluber ka dang hap hapoh jong ka West Karbi Anglong, Assam bad i Kong Banikas Laban i dei i nongshong shnong jong ka Karbi Anglong Assam te kumno i leit ban ïakhun Election MDC na 12-Barato Mukroh Constituency jong ka JHADC? Lah ban dei na kata ka daw ba ki sa ujor ïa kane ka ejahar pyrshah ïa i.
Ka shnong Mowluber ka dei kaba danghap hapoh jong ka West Jaiñtia Hills District Meghalaya, bad i Kong Banikas Laban i dei i nongshong shnong ba pura jong ka jylla Meghalaya bad ilah ban pynshisha ïa kane lyngba ki kot ki sla jong i bad da kumta ka Election Commission jong ka ri India bad ki bor pynïaid Election jong ka Meghalaya ruh kim khang ei ei ïa i ban ïa ai reng ha kane ka Election, la ong ka Forum.
Te kumta ka Forum bad ine i Kong kila kyrpad ïa u Deputy Commissioner jong ka West Jaiñtia ba un shimkhia mardor halor kane ka kam khnang ba kan ym ktah ei ei ïa i ha ka leit ka wan bad ka shong ka sah jong i.
Ka Forum ka dawa ruh ïa ki briew kiba donkti ban ujor ïa kane ka ejahar ba kidei ban leit weng noh ïa ka hapoh san sngi, lymda kumta ka Forum kam banse ban shim da ka sien jam kaba kham tyngeh. Ki Karbi kidei ban burom ïa ki Khasi Pnar kiba dei ki trai shnong bad kim dei ban thaw jingklumar ei ei bad ruh kidei ban pynneh pynsah ïa ka shongsuk shongsaiñ bad lada mih kano kano ka huri hura na kane ka daw te kito kiba ujor ïa kane ejahar kidei ban shim ïa ka jingkit khlieh.
Ïa kane ka kyrwoh la phah da u Bah Chandame Sungoh, Chairman – HBDRF bad i Kong Banikas Laban.