Ka Jaiñtia National Council (JNC) Khliehriat Circle mynta ka sngi jong ka 4/09/2024 ka la ia kynduh markhmat bad u EE ka PWD NEC Division, Khliehriat ryngkat bad ka jingthoh ban dawa maramot noh ia u surok shnong (internal road) jong ka Khliehriat West bad East uba la jot rathai.
Ka seng hapoh ka jingialam u President ka Khliehriat Circle bah Shanborlang Bamon haba iakynduh bad u EE ka pynpaw iaka jingsngewkhia kaba jur ba kum ka shnong kaba dei ruh ka Headquarter jong ka District katno tam ka long kaba sniew dur shisha ban iohi iaka jingjot jong u surok hapoh shnong.
Ka jingjot jong une u surok ka pynlong ka jingeh khamtam iaki khynnah skul ki nongtrei bapher bapher kiba pyndonkam ia une u surok bad ka jingsniew jong une u surok ka buh jingeh wat iaki nongtrei sorkar kiba iaid lyngba jong u.
Ia ki surok jong ka shnong la pyndonkam ym tang ia ki nongshong shnong hynrei ia bun bah ki shnong kiba leit donkam namar baka dei ka shnong kaba don ia baroh ki shnad treikam ka sorkar, te lada kane ka Shnong kam long shngaiñ haki bynta jong u surok katno tam kan buh ka jingeh kaba khraw ia u Paidbah. ong u President ka Circle.
Ka seng ka pynpaw ruh ba ka la juh sakhi man ka por iaka jingtakhuh kali bad kiwei kiwei ki jingjia tang namar ba sniew u surok bad kane ka buh jingma iaki nongiaid, ka seng ka buh ka jingkyrpad ia u EE ban leh iakaba donkam tam khnang ban wanrah biang iaka suk ka saiñ jong u paidbah haki sngi ki ban sa wan namar lada ka surok hi ka bha u paidbah ruh u shngaiñ.
Naka Liang u EE u la kular ha khmat ka seng ban leh iakaba dei eh bad u la ong ruh ba shen yn sa shna noh iaka estimate project naka bynta une u surok bad yn sa phah ruh sha ki bor kiba halor ban ioh leh iaka ba donkam.
Ka seng ka pynpaw ka jingsngewnguh ia u EE ba u la kloi ban leh ia kaba dei eh bad ka seng hi kaba shakri naka bynta ka bha ka miat, kan sa iai shakri kat kaba lah ha ka bor barit naka bynta ka jingmyntoi u paidbah.