Ki nongialam jong ka Jaintia Student Union (JSU ) hynne ka sngi ka 4 tarik Nailar 2025 ki la iakynduh ia u Lat ka Jylla u CH Vijayashankar ban dawa pynlong ia ka Jowai kum ka Summer Capital.
Haba kren sha ki lad pathai khubor na ka liang u President ka Jaintia Student Union u samla Jersom Shylla u la ong, ka jingkynduh ka seng ia u Lat ka jylla ka long halor ka jingdawa ban pynlong ia ka Jowai kum ka Summer Capital jong ka State. U la ong naduh ba ioh ia ka jylla ha ka 21 tarik u snem 1972 ki don tang 3 tylli ki jaitbynriew kata ka Khasi, Jaintia bad Garo.
Nalor kata u la pyntip ka jingdawa ia ka Summer Capital ka dei namar ka Jaintia ka dei kaba nyngkong ban ioh District ha ka state ha ka 22 tarik February 1972 bad ka Jowai ka dei ka Headquarters kaba nyngkong eh ha Jaintia, bad ka jingdon ia ka Jaintia Hills Autonomous District Council ha u snem 1964.
Halor ka jingdawa ki Garo ia ka Winter Capital, ki Jaintia ki don ia ka hok ban ioh ka Summer Capital.
Shuh shuh u la ong haba iadei bad ka roi ka par ka dang duna bha, namar tang kawei ka College Sorkar kata ka Kiang Nangbah Govt College ka ba don ha Jowai, bad la dawa ban buh Government College ha East Jaintia, hynrei na ka liang ka sorkar kam pat ai haduh mynta. U la ong haba phai sha ka liang ka tnad ka koit ka khiah ka dang duna shibun khamtam ki hospital bad ki tiar ki tar ha ka liang ka tnad ka koit ka khiah bad kine ki dei ki mat halor ka jingdawa ia ka Summer Capital.
U la ong ka Jaintia ka dei kaba synniang haduh 30 percent sha ka sorkar haba iadei bad ka khajna, bad ka Jaintia ka dei kaba pynmih haduh 70 Percent ia u Dewīong bad ka noh synniang shibun sha ka jylla bad balei pat ia ka roi ka par shu rah beit tang sha Garo bad Khasi. U la bynrap ka sorkar kam dei ban ñiew shiliang khmat haba iadei bad ka roi ka par bad ka sorkar ka kwah ban jan sha u paidbah balei pat kam jan sha Jaintia.
U la kyntu ia ki nongmihkhmat khamtam ia 3 ngut kiba don ha ka shuki Myntri ba kin rah ia kine ki mat ha ka session ka ban sa long shen na ka bynta ki nong Jaintia kaba ka Seng ka la pynsngew sha u Lat ka Jylla.
Shuh shuh u la ong ka Seng ka la iakren ruh halor ka jingdawa ban pyntreikam ia ka ILP, hadien ba ka sorkar ka la pass ia ka Resolution ha ïingdorbar ban dawa pyntreikam ia ka ILP ia kaba mynta ka dang don ha ka sorkar pdeng.
U samla Jersom ula bynrap,”Lada sha kiwei ki jylla kum ka Arunachal Pradesh, Manipur, Nagaland, Mizoram ki la ioh ia ka ILP. U la ong haba phai mynta sha Assam ngi iohi ba kumba 30 hajar, 40 hajar ki don kine ki bar jylla bad lada ki wan sha ka jylla Meghalaya ngin sa shah tyllep kum ki rit paid bad donkam ia ka ILP kaba long ka itiar ka ban iada ia ki rit paid bad ka Seng ka la pynsngew ha u Lat halor ka jingdonkam ban don ia ka ILP.
