Ki kynhun sengbhalang bapher bapher kiba don ha Barak Valley jong ka jylla Assam kiba kynthup ïa ka Barak Udayam NGO, Badarpur, ka Awaz Foundation NGO, ka Badarpur Development Parishad, Netali Foundation, Lion Club of Badarpur Greater bad kiwei de dang shen ha kane ka 13 tarik kila phah da ka shithi sha u Prime Minister jong ka ri India u Narendra Modi na ka bynta ban pynpaw ha u halor ka jingsniew kaba sha palat pud jong u surok bah NH- 6 ha kine ki sngi.
Na ka liang jong katei ka la buh ka jingkyrpad ïa u Modi ba kumba u long u briew uba shimkhia ban wanrah ïa ki lynti syngkieng kiba thymmai bad kiba bha hapoh ka ri India hi baroh kawei, kumta ki kyntu ïa u ba un sngewbha ban phai khmat lem sha une u surok bah NH-6.
Katkum kane ka shithi ba la phah sha ka ophis treikam jong u Prime Minister ka ri India kaba don ha 152, South Block, Baisina Hill, New Delhi, kine ki kynhun kila pynpaw ïa ka jingeh kaba khraw kaba ki nongshong shnong jong kane ka thaiñ ba shathie jong ka jylla Assam (Barak Valley) ki ïakynduh. Kila pyni ba kum ki nongshong shnong ki don tang une u wei ka surok u ba pynïasoh ïa ka Assam ba shatei bad ka Assam ba shathie (Silchar – Guwahati), nalor kata une u surok bah u pynïasoh ruh ïa kiwei pat ki jylla kum ka Mizoram bad ka Tripura.
La pynpaw ruh ba ki bynta kiba une u surok u sniew eh ka long naduh na Malidor shaduh sha Lumshnong kaba jngai kumba 50 Kms. Kine ki kynhun sengbhalang kila pynpaw ba ka jingsniew shaba palat jong une u surok bah kala buh jingeh khamtam haba jia ki jingpang jingshitom bad kiwei ki kam kiba hap ban ïabeh kyrkieh.
Khadduh eh kila buh ka jingkyntu ïa u Prime Minister Modi ba un shimkhia dalade ban bthah ïa ki bor ba dei peit ban pynshna bad maramot noh ïa kine ki bynta ba la sniew jur jong u surok bah NH-6.