Ka National People’s Party Women Front (NPPWF) Meghalaya State Unit hynne ka sngi ka 07 tarik Nailar 2025 kala leit iakynduh ia u Myntri Rangbah ka jylla Conrad K Sangma ban pan jaka na ka sorkar ban tei ia u motdur jong ka Phan Nonglait, ka riewshlur kaba mih lang ban iakhun ha ka por jong u Tirot Sing ban iakhun ia ki dohlieh ha kito ki por.
Kum ban shu pynkynmaw na ka liang jong ka National People’s Party haka sngi kynmaw burom ia ka lyngkhuh sngi iap jong u Syiem ka Hima Nongkhlaw u Syiem Tirot Sing ha ka lyngkhuh sngi iap kaba 190 haka jingialang buh syntiew ha u mot dur uba la pynieng ha State Central Library Shillong ki la dep ban ia kren ia kane ka bynta ba donkam ban kynmaw burom lang ruh ia ka Phan Nonglait.
Na ka liang ka Kong Grace ka la ai jingmut ruh ia ki nongialam jong ka party ba kin tyrwa sha ka sorkar ban don ka jingkynmaw burom lang ia ka Phan Nonglait kaba dei kawei na ki shipai ba shlur jong ka Jaidbynriew kaba la don ka bynta kaba khraw ban iakhun ia ki dohlieh ha ka por jong u Syiem Tirot Sing.
Naka liang ka National People’s Party Women Front Meghalaya State Unit haka jingialam jong ka President ka Kong Grace Mary Kharpuri ryngkat lang u Working President Bah Hamletson Dohling nangta u Bah Himalaya M Shangpliang ki la leit ban kyrpad ha ryngkat ka jingthoh naka bynta ban ai jaka ban tei ia u mot sahkynmaw jong ka Phan Nonglait kaba dei kawei na ki riewialeh ban pynioh ia ka jinglaitluid na ka kti ki Phareng.
Ha ka shithi ka Kong Grace ka la buh ka jing kyrpad hakhmat u Myntri Rangbah Conrad K Sangma ban ai ka jaka na ka bynta ban tei ha Phan Nonglait Park kaba don hadien jong ka Civil Hospital kaba dei ruh ka jaka kaba itynnad ban buh ia u motdur bad kaban iahap na ka bynta kane ka riewshlur.
