Ka jinglum khajna kaba ym ioh ia ka jingtip ba tikna na kano ka lynti bad ka nongrim, ka la pynlong ïa ki nongialam ka Meghalaya Traders Fresh Vegetables and Ginger Association, ha ryngkat ka jingsynran lang ki nongialam ka Federation of Khasi Jaintia and Garo People FKJGP, ban leit iakynduh ia ka Myntri ka Tnad Ka rep ka riang ka jylla ka Kong Mazel Ampareen Lyngdoh ban pynsngew ia ki jingeh ba ki la mad bun bun bnai Ha ka jingïoh iakren markhmat bad u bah Brister Mawthoh, President ka Association, u la ong ba kane ka jingshah lum khajna palat pud ha ki weight bridge kadei ka ba laslem bad na ka liang ka Association ki la wan ruh ban pynsngew ha u Symbud Myntri Rangbah ka Jylla, u Bah Prestone Tynsong bad ha u Bah Sniawbhalang Dhar, na kane ka jingkynduh na ka liang u Symbud Myntri Rangbah u la bthah ban pynsangeh noh ia kane ka jinglum khajna hynrei haduh mynta ka dang iaid long kumba ju long.
Kaba kham lyngngoh ka long ba ki la iathuh ba kane ka jinglum khajna kadei ka bym tip tikna mano ba ai bor bad pyniaid. Hadien ka jingioh iakynduh bad i Kong Ampareen, u Bah Brister u la iathuh ba na ka liang ka Myntri ka la kular ban shimkhia bad kan sa khot ia ka jingialang bad ki ophisar ka Tnad Transport, ka Tnad Agriculture, ka Tnad marketing bad u DIG ban iakren halor kane.
U Bah Mawthoh u la pynpaw ruh da ka jingsngewkhia ba kane ka jinglum khajna lane ka jingdawa ka poi haduh 1000 tyngka lane tam bad ka jingshah pyndik ia ki nongñiah kali ka long khari khari. Da kane ka jingshah pynthud, kan ktah ia ka por bad ka jingpynpoi jhur shabar jylla.