Ka Meghalaya Sports and Youth Affairs (MSYA) ka la ai Khublei kyrpang ia u Rikangku D. Sangma uba na ka shnong Karukol Jalaigre, Baghmara South Garo Hills uba la ioh ban khur ia ka takma Rnong ha ka lympung 39th National Junior Athletics Championships 2024, Bhubaneswar, Odisha kaba dei ruh ka takma ba nyngkong ba ka jylla Meghalaya ka la ioh na ki lympung ba heh (National) ha ki 25 snem ba la iaid lynti ha ka jingïalehkai (athletics).
Na ka liang ka MSYA ka kdew ruh ba lada la jylla ka don ia ki jaka kilan met ba paka, ka lawei jong ki Samla ka jylla kan tyngshaiñ. Ym lah ban len ka jylla ka duna shibun ki ïing ne jaka kilan met (infrastructure) ba la shna kyrpang na ka bynta ki samla ha ki thup ialehkai bapher bapher.
Kane ka jingiaid lynti jong une u khynnah 12 snem kan long ruh ka khana pateng ka ban sah kynmaw na ka bynta ka jylla baroh kawei ha kaba u la lah ban pynkheiñ ia ka rekod ba la buh da u Bah Beningstar Lyngkhoi, kata ia kaba u la ioh takma khatduh na ka bynta ka jylla ha u snem 1999.
U Rikangku u la mihkhmat na ka skul Karukol Higher secondary school ha ka jingialam bad jinghikai u Coach Pleasantly Synnah. Katei ka takma ka la wan hadien ba u la lah ban ïalehkai bha ha ka Javelin Throw da ka jingjngai kaba kot 51.91 M.