Ka Shillong Lajong FC ka la mad biang ia ka jingjop ha ka jingïakhun kaba ar jong kane ka lympung lyngba ka jinglah ban pynliem ia ka Rangdajied FC da 2-0.
Ka jingialehkai ka long kaba itynnad namar ka dei ka sien ba nyngkong ha ka history jong kane ka lympung ba 2 tylli ki klob Khasi kin ioh ban ia aireng. La sakhi ruh ia ka jingtuid jong ki paidbah nongkyrshan ban ai mynsiem ia baroh ar tylli ki klob Ka Rangdajied kaba dei ka klob kaba la shu shah khot ha ka khyllipmat ba khatduh na ka bynta ban iashim bynta ha kane ka lympung kaba heh, ka khlem pat ioh ia ka jingjop bad mynta kane ka kynhun kan sah satang kawei ka jingïakhun, kata pyrshah ia ka Tribhuvan FC.
Ka long pat ka kabu bad ka jingmyntoi na ka bynta ka Rangdajied watla kim ïoh shuh ban rung sha ka wat ba 16 (round of 16), watla katta, lyngba ka jingïoh ban iaid lynti ha kane ka lympung kaba don ia ki klob Indian Super League bad I-league ka la pynioh mynsiem bad kyntiew ia ka buit ïalehkai jong ki.
Haba phai ha katei ka jingïakhun, la sakhi ba ka Lajong ka kham khlaiñ shibun bad kham ioh ruh ki kabu ban pynkhih jar. Ha ka jingïakhun na ka bynta ka kylla step, ka Lajong ka la ioh ban thep shi kol lyngba u Rooney ha ka minit ba 22, bad ha ka kylla miet la ioh ban thep sa shi kol lyngba u Ken ha ka minit ba 48.
Lyngba kane ka jingjop, ka Goa bad Lajong ki la ioh ban rung (qualified) sha ka wat ba 16 jong kane ka lympung.
