Ka tnad treikam jong ka Meghalaya Power Distribution Corporation Limited (MePDCL) kala pynmih ia ka jingpynbna paidbah ba na ka daw jong ka jinghiar palat jong ka um ha ka Dam jong ka MeECL ha Umiam, kumta ka tnad kam banse ban pyntreikam ia ka Load shedding hapoh ka jylla hi baroh kawei.
Ka load shedding na ka bynta ka ri lum Jaintia kan sdang naduh ka 30 tarik mynta u bnai tad haduh ban da pynmih da kawei pat ka jingpynbna paidbah.
Katkum ka jingpyntip jong ka tnad MePDCL la iathuh ba ka jingpynlip bor ding kan iaid katkum ki Sub-Station bapher bad ki por ba iapher na kawei ka thaiñ sha kawei pat.
Ka jingpynlip ia ka 132/33 kv Khliehriat Sub-Station kan sdang naduh ka por 10:00 AM haduh 12:00 AM. Ki shnong ki ban shah ktah ki dei baroh ki bynta jong ka shnong Khliehriat, Sutnga, Rymbai, Bapung, Saipung bad baroh kiba hap hapoh kane ka Sub-Station.
Kan ktah ruh ia ki bynta jong ka shnong Shangpung, Mookaiaw, Iooksi bad ki shnong ba marjan.
Ka jngpynlip ia ka 132/33 kv Lumshnong Sub-Staion kan sdang naduh ka por 4:00 PM haduh 6:00 Pm. Ki shnong ki ban shah ktah kin long baroh ki shnong kiba hap hapoh ka Narpuh kiba kynthup ia ka Lumshnong, Sonapur, Umkiang, Ratacherra bad ki shnong ba marjan.
Ka jingpynlip ia ka 132/33 kv Mustem Sub-Station kan sdang ha ki ar bynta kawei naduh ka por 12:00 PM haduh 2:00 PM bad kawei pat kan sdang naduh ka por 12:00 AM haduh 5:00 AM. Kane ka jingpynlip bor ding kan ktah ia baroh ki bynta jong ka nongbah Jowai, ia baroh ki shnong kiba hap hapoh ka Amlarem Sub-Division bad Thadlaskeiñ Block kiba kynthup ruh ia ka Wahiajer, Nartiang, Mynsngat, Thangraiñ bad ki shnong ba marjan.