Ki samla pule ka Skulbah NEHU ki ba don hapoh ka Lama jong ka North Eastern Hills University Students Union (NEHUSU) bad ka Khasi Student Unions NEHU unit ha ka 2 Tarik Nohprah 2024 , ki la shim ia ka rai ban pynlong klass noh naduh ka 3 Tarik Nohprah 2024 , hadien ba ka Inquiry Committee ka la shimti ban tohkit ia ka kynrum kynram hakane ka Skulbah. Lah ban kdew hangne ba na ka liang ka NEHUSU bad ka KSU NEHU Unit ka la sdang da ka jingiakhih da kaba shahthngan naduh ka 5 Tarik janmied bad rai ruh ban pyntreikam ïa ka jingkhangdam ba pura (total lockdown) kaba khlem buh por hapoh kane ka skulbah.
Mynta ka sngi na ka liang ka NEHUSU, ka KSU NEHU unit ka NEHUTA, ha ryngkat ki nongialam ka KSU Central body , ki la wan ban lum lang hajan ka Ophis treikam u Vice Chancellor, hadien ba mih ka khubor ba u VC ka NEHU u Prof. P.S. Shukla u la pan ia ki bor pahara kaba khlaiñ na ka Sorkar pdeng ba un leit shimti biang ia ka shuki VC ha NEHU hadien ba u la kut ka shuti, hynrei ha kane ka sngi na ka liang u VC Incharge ka NEHU u Prof. Nirmalenda Saha u la pyntip ba la pynjlan biang ia ka shuti u V.C. haduh ka 13 Tarik Nohprah 2024. Na ka liang ki samla pule kiba kynthup ia ka NEHUSU bad KSU-NEHU Unit, kila ieng pahara ha khyrdop jong ka skulbah hynne ka step naduh ka por 8:30 mynstep da ka jingthmu ban pakhang lynti ia u Prof. P.S. Shukla ba un wan rung sha campus.
Haba kren sha ki ladpathai khubor, u Toniho Kharshandi u General Secretary ka NEHUSU u la ong ba ka jingiakhih ban sangeh ban pynlong klass ka la jan kot sha ka Shibnai tam bad namar ka jingpynjlan shuh shuh ia ka shuti u VC, kumta na ka liang ki samla pule ki la shim ia ka rai ban sdang klass noh kumba ju long hynrei ka jingiakhih ban wan shong kyllaiñ myngngor hakane ka jaka kan bteng beit haduh ban da weng noh ia u Prof. P.S. Shukla na kane ka Skulbah.
