Ka long ka khubor kaba bha ïa ki nongrep jong ka shnong Lapangap namar ba ki bor pynïaid District kin shah ban sdang noh ban leit ot ïa u kba naduh lashai ka sngi 22 tarik u Risaw.
Ia kane la leh hadien ka jingïakren pynbeit da u Myntri Rangbah ka jylla Meghalaya u Conrad K Sangma bad u Chief Executive Member ka Karbi Anglong Autonomous Council (KAAC) ha ka jingïatreilang ki riew rangbah, kynthup ki Waheh Shnong na baroh ar tylli ki shnong.
Ban pynneh pynsah ïa ka shong suk shong shngaiñ ha kitei ki jaka, na ka liang ki Magistrate bad ki Pulit kin ïadonlang ban leit pahara ïa ki nongrep ha kitei ki jaka ot kba haka shnong Lapangap-Tahpat.
Shuh shuh ki bor synshar District kila pynpaw ruh ka jingsngewnguh ïa ki paidbah nongshong shnong na baroh ar jaitbynriew kiba la don ka mynsiem ïaishah bad kiba sngewthuh jingmut ïa ka jingpynbeit na ka bynta ban wanrah biang ïa ka jingshong suk ha kitei ki jaka khappud.
Shuh shuh ki bor District kila pyntikna ba ka jingleit ot ïa u kba kan long kaba ïaid beit ïaid ryntih bad kaba shngaiñ khlem da don kano kano ka jingjia ha kine ki sngi ban wan da ka pan ruh ka jingïatreilang na baroh ar tylli ki jait bynriew (Pnar-Karbi) kiba shong basah ha katei ka jaka.
Katkum ka tyllong khubor bala ïoh lum mynta ka sngi ki nongrep na Lapangap kila ïoh lad ban leit ot ïa u kba sha ki bynta kiba kham shaneng jong ka pynthor kba.
