Ka Night Curfew ne ka pakhang miet ha nongbah Delhi kan sdang noh naduh mynta ka miet ka ban treikam naduh ka por 11:00 PM haduh 5:00 AM.
Ia kane ka rai la shim da ka sorkar Delhi hadien ba ka jingkiew jong kiba ioh ia ka jingpang Covid-19 kala kynjoh sha ka 0.55%.
Katkum ka jinglum jingkheiñ ba tang hynnin ka sngi u Blei ka nongbah Delhi ka don 290 ngut kiba ngat ha kane ka jingpang kaba la pynkynjoh sha ka 0.55% kiba don ia kane ka jingshitom. Katkum ka kaiphot jong ka Graded Response Action Plan (GRAP) la iathuh ba lada kane ka percentage kan neh ar sngi lynter hapoh nongbah Delhi, kane ka nongbah kan sa shah pynhap ha ka ‘Yellow Category’.
Lada pyntrei ia ka Yellow Category kan sa don ka jingpakhang miet, ka jingkhang ia ki skul bad college, ka jingpynduna ia ka jingshong briew ha ki bus, ki metro bad ha ki rel. Nalor kata kan sa don ka jingphah khang ia ki dukan bad ki mall ki bym dei ki dukan ba die ia ki mar jingdonkam ba donkam eh (Non-essential shop).
Kiba lah ban iaid hapoh ki kynta jong ka night curfew ha nongbah Delhi ki long:-
- Ki briew kiba iaid kjat ban leit thied ia ki jingbam ba donkam ha ïing ha sem na ki dukan ba marjan.
- Ki briew kiba leit ne wanphai na ki airports, railway station bad bus stop, tangba kin hap ban pyni ia ki tiket jong ki.
- Ki nongthoh khubor jong ki Print and Television
- Ki briew kiba pynpoi ia ki mar bam bad ki dawai dashin
- Yn shah ban plie ia ki dukan die jhur, die dud, die doh bad kiwei ki mar bam
- Yn shah plie ia ki Pharmacy bad ki jaka buh dawai
- Ki briew kiba leit ai tika Covid da kaba kin pyni ia ki kot ba donkam.