Ka Khasi Students” Union (KSU) Jowai Unit mynta ka sngi Saitjaiñ kala pynlong ïa ka prokram pynkup burom ïaki samla pule ka thaiñ kiba la Pass bha haka Exam SSLC bad HSSLC kaba la tip kum ka “2nd Mait Shaphrang Academic Award 2024”, haka jingïalang bala pynlong ha Vianney Hall Marian Hills, Jowai. Ha kane ka sngi ki samla pule shynrang bad kynthei kiba la ïoh ïa kane ka khusnam kila don haduh 30 ngut baroh kine ki samla kiba la kynjoh sha ka 80 percent ha ka jingïoh ïa ki Mark ha ki Exam jong ki.
U samla Pynkmenlang Sanmiet uba dei ruh u Education Secretary (CEC) ula long kum u kongsan, ha ka jingdonlang u symbud kongsan ma Almo Syiem na ka ophis DSEO, u ma Sunday S. Manner, OC ka Jowai Police Station, President ka Jowai Unit samla Ewanmi Phawa, ki nongkitkam ka seng, nalor ki kmie ki kpa jong kitei ki samla pule.
Haba ai jingkren u samla Pynkmenlang Sanmiet ula ong “naduh u snem 2013 hadun mynta, ym pat don shuh ki samla trai ri kiba la pass ïa ka kyrdan ba halor eh ka IAS napoh ka jylla”, kumta u buh ka jingkyntu ïa ki samla pule ba kin trei shitom met bad mynsiem ha ka jingpule tad haduh ban da ïoh kiew ha kliar jong u lum ban bat ïa katei ka kyrdan.
Ula pynsngew ba ka thong jong kane ka jingai khusnam ka seng sha ki samla pule kiba don ha kylleng ka bri u Hynñiewtrep, ka long kum ka dak ban ai mynsiem shuh shuh ïa ki ba kin pynleit jingmut haka pule ka phithi, khnang ba ka jylla kan ïoh hi da ki trai jylla ban shong haki shuki treikam jong ki kyrdan bapher bapher.
Ha ka juh ka por ula kitbok kitrwiang ïa ki samla pule ba kin nang ban jied ïa ki ar tylli ki ummat ban ai sha ki kmie ki kpa kata ka “ummat jingkmen bad ka ummat jingsngewsih”. Ula kitbok kumjuh ïa ki nongkitkam ka KSU Jowai Unit ba kan dang ïaitrei shaphrang ïa ki kam babha hapoh ka imlang ka sahlang da ka jingkyrshan borbah jong ka CEC.
U ma D. Syngkon kum u symbud kongsan uba pynsngew sha ki samla pule halor ki lai bynta:- kata ban pynmlien ïalade ba pule ïa ki kot, kaba ar ban tip ïa ki ‘General Knowledge” bad kaba lai ban pynthymmai ‘update’ manla ka por ïa ki jingtip kiba thymmai.
Katba u ma Sunday Mannar, OC ka Jowai ula kyntu ïa ki samla pule ban long ki khlur ka Ri, namar ym don jingeh “lada phi don ka thong ha ka jingim da kaba buh jingkylli balei kiwei ki lah”, ula kyntu ban don ka akor burom, ban buh ïa u Blei ha ka jingim. Da kaba husiar ïa ki kam thok kam shukor kiba mih na ki Social Media lyngba ka Mobile Phone.
