Ka jingiaid kiew jong ka dor umphniang Petrol bad Diesel man la ka sngi kala buh ha ka jingeh kaba khraw ia ki nongniah kali kamai bad ym tang katta hynrei mynta ba ka sorkar kala pynkiew syndon sa ka bai renew ne pynthymmai ia ki Permit kali Tourist bad kane kala pynlynniar hi kliang ia ki nongkamai kali kamai kumjuh ia ki trai kali.
Ha kaba iadei bad kane ka seng ki nongniah kali kamai na ri Lum Jaintia kiba don hapoh ka lama jong ka All Jaiñtia Tourist & Commercial Vehicle Association (AJT&CVA), kila mih paidbah ban pynpaw ia ka jingpyrshah jur halor ka jingpynkiew dor kynsan jong ka sorkar ia ka Permit kumjuh ruh ia ka dor jong ka umphning Petrol bad Diesel. Ha kane ka jingmih paidbah ki dkhot nongniah kali kamai ki la pynlong ia ka jingteh lama iong ia ki kali Tourist ryngkat ka jingrah ia ki placard.
U ma Paila Kordor Lyngkot, President ka AJTCVA, haba ai jingkren ha ka jingialang u la ong ba ka seng ka la khot pynlong ia kane ka program ha West bad East Jaintia Hills District, ban pynpaw ka jingpynrem bad pyrshah jur ia ka jingleh bein jong kane sorkar MDA ba mynta ia ki paidbah kaba la ktah ym tang ia ki nongniah kali hynrei ia baroh ki nongleit nongwan khamtam ia kiba duk ba rangli.
U la ong haba phai sha kine ki ar snem bala leit ba baroh ki dkhot jong ka seng ki don ha ka jingeh kaba khraw ban ia khun ia ka khlam Covid-19, kaba la pynduh kamai kajih ia ki kum ki nongniah kali kamai, hynrei wat la katta ruh ka sorkar ka dang pynshitom shuh shuh ia ki ha kiba bun ki liang, u la ong ba dang ha kine ki sngi kiba la dep ka sorkar kala pynkiew ia ka dor bai Permit na ka 3 hajar tyngka sha ka 15 hajar tyngka bad na ka bynta ki kali ba don A/C la pynkiew shaduh ka 25 hajar tyngka, kane ka long ka jingeh kaba khraw haduh katta katta ia ki kum ki nongniah kali ban pyndap pynbiang ia ka iing ka sem jong ki.
Mynta ka sngi la ioh ruh ia ki jingkren na u President ka Nongkynrih, Mookyndeng bad Raliang ma Daniel Dkhar, General Scretary AJCVA ma D. Tang, ha ka jingdonlang u President ka Jowai Shillong Tourist Cab Association (JSTCA) ma Anthony Pohshna bad kiwei de ki dkhot bapher bapher hapoh jong ka AJTCVA.
