-Hun ka ïing Kashari ïa ka rai jong ka Sorkar Jylla-
U Bah Paul Lyngdoh, Myntri ba khmih ia ka Tnad Jngohkai pyrthei u la iathuh ba ka Meghalaya High Court ka pynpaw ia ka jinghun halor ka jingshim rai jong ka Sorkar Jylla ban weng ia kiba shongdie madan bad buh pat ia ki ha ka jaka ieng kali jong ka MUDA ha 9-Lad.
Hadien ka jingiakynduh lang hynne mynstep (29.07.2025) bad katto katne ki ophisar ryngkat ka jingdonlang u Symbud Myntri Rangbah ka Jylla, Ma Sniawbhalang Dhar uba dei ruh u Myntri ba khmih ia ka kam pynroi Sor, la rai ba yn khang noh ia baroh ki jait kali – ar bad saw shaka ban iaid lyngba na 9-Lad sha Umsohsun hynrei lait noh tang lada don ki kam kiba kyrkieh, kata ha ka shitom bad ka mynsaw. La buh ba ka por ban khang iaid kan long naduh 7 baje mynstep haduh 9 baje mynmiet bad kane kan sdang ban treikam ha une u bnai ban wan. Katba ia kito kiba sah ha kitei ki thaiñ, yn pynbiang tang kawei ka Car Pass ia kawei shi ïing.
U Myntri u la iathuh ruh ba ka Sorkar kan ym iehnoh shiteng lynti ia kito kiba la kynriah sha MUDA hynrei la rai ban ai ka jingiarap mar 10,000/- na ka bynta ban pyntikna ba ka kamai jong ki kan ym shah ktah bad ia kane ka jingiarap yn sam ha ka 5 tarik Nailar.
Nalor kata, u Bah Paul u la iathuh ba ka Sorkar kan thawlad shuh shuh na ka bynta ban pynitynnad ia ka 9-Lad da kaba kylliang ia ki Tiles ha ki lynti iaid, ban airong bad dro dur ia ki kynroh. Ym tang katta, bad wanrah ia ka jingkhuid bad suba, yn shna ruh 15 tylli ki painkhana ryngkat ka um dih kaba biang ha khrum jong ka MUDA.
