-Mih biang ki MDC Liang Pyrshah na ka Dorbar ha ka sien ba ar-
Ha ka sngi ba 3 jong ka Dorbar Lyiur lane ka Dorbar Mang Tyngka jong ka Khasi Hills Autonomous District Council (KHADC), u Bah Strong Pillar Jana – Shongknor u la sdang da kaba pynbna ia ki kyrteng jong 5 ngut ki Dkhot kiba lah ban shim bynta ha ka Dorbar lane ha ka jingiatai kyllum (General Discussion). Ha shwa ba ka jingioh bynta jong kitei ki Dkhot kan sdang, u Bah Synshar Kupar Roy Lyngdoh Thabah MDC UDP na Nongspung Sohiong u la ieng da kaba ong, kumno lah ban ailad tang ia ki Dkhot kiba la ai kyrteng lypa ban iashim bynta ha ka jingiathir na ka bynta ka Mang Tyngka 2025-26. Haba jubab ia kane u Shongknor u la ong ba ha ka 24 tarik la dep ban pynbna ba kino kino ki dkhot kiba thmu ban iashim bynta ha kane ka sngi ki dei ban ai kyrteng lypa ha Shongknor hapoh ka 4 baje janmiet.
Haba pynpaw ia ka jingbym sngewhun, u MDC na Langrin Bah Pius Marwein u la bynrap da kaba ong “da ka ain aiu ba ym shah ban ym iashim bynta ha ka Budget Discussion” “nga khlem ong ka ain aiu hynrei ha kato ka sngi la dep ban pynbna lypa. Lada nga pynkylla ka lah long biej ia ngi” ong u Shongknor.
U Bah Titos Chyne MDC na Sohra u la ong ba khlem thoh ha ka Constitution jong ka Council ban ai kyrteng lypa ha shwa ban iashim bynta ha ka Dorbar hynrei u Bah Strong Pillar u la iai pynksan da kaba ong ba kane kadei kaba la dep bthah lypa bad ha ki snem ba la dep ruh la ju pyniaid da kane ka rukom. “Nga la ailad bad nga khlem noh shilliang shano shano ruh” pynshai u Shongknor. Hadien ba pule ia ka Rule 42 jong ka Council kaba ong ba ka rai ba khatduh ka dei na u Shongknor, u Bah Titos lem bad kiwei ki MDC liang Pyrshah ki la mih noh na ka Dorbar uwei hadien uwei.
Haba bteng ia ka Dorbar, u Bah Seiborlang Warbah EM ba khmih ia ka Tnad Pisa Tyngka, u la ong ba ka EC kan iakhun na ka bynta ka jingbha ka kam watla iaid lyngba shibun ki jingeh haba sdang ia kane ka jingiaid lynti. U la ong ba ka EC ka la dep ban phaidien ban ïit bniah halor ki kam ba ka EC barim ka la dep ban leh bad da ka jingthmu ban pynbha, ka EC ka la pyrkhat da kawei ka lad na ka bynta ka jingmyntoi ki paidbah kiba don hapoh u pud u sam ka Council. Shuh shuh u la ong ba watla ka EC barim ka la wanrah shibun ki kam ba ki paidbah kim hun, ka EC ba thymmai kan ialeh ban pynbha, pynthymmai, bad rat dyngkhong ia ki kam ba la leh buhrieh ha ki snem ba la dep. Shuh shuh u la ong ba ka EC kan iakhun ruh na ka bynta ban pynbeit ia ka rukom thungkam hapoh ka Council bad kiei kiei kiba la dep, ka EC kan ym bteng shuh na kajuh ka lynti hynrei kan ai ia ki paidbah kaba bha.
Da kaba buddien ruh ia ka jingpynlut phut ia ka pisa, u Bah Seiborlang u la ong ba ka EC ka la ialeh katba lah ban ym pynsyrwai kai ia ka pisa bad ha kaba iadei bad ka jingthung ia ki EM ruh ka EC ka la thung tang khyndiat na ka bynta ban myntoi ha ka lut phut “ngin pyrshang ban wanrah ia ka lynti kaba beit bad kaba shai. Ka EC kan eksamin ruh ha kaba iadei bad ka rukom pynlut pisa” pynpaw u Bah Warbah.
