Ha ka jingmih surok jong kawei ka longkmie ia kaba la wan ban synran da ka HYC bad kiwei ki seng na ka bynta ban pynrem ia ki katto katne kiba la pynbudnam ia ka Jylla kum ka ktem sniew, ka Jylla kaba dap da ki kam runar, ka jaka kaba khaïi ia ki dkhot met bad ka jylla ka bym shngaiñ tam, ka HYC ka la shim ia kum kane ka kabu ban kynnoh ba kane ka jingjia ka wan ban long khnang ha ka Jylla na ka daw ba ka Sorkar kam treh ban pyntreikam ia ka Inner Line Permit (ILP) lane ia ka Meghalaya Resident Safety and Security Act (MRSSA).
Kane ka jingiakhih ba jai jai ba la pynlong ha 9-Lad, la ialam da u President ka HYC, Bah Roy Kupar Synrem. Katkum ka jingkynthoh jong une u nongialam, la ong ba kine kiei ki jia dei na ka daw ba ka jylla jong ka laitlain palat. U la ong ruh ba ym don jingshngaiñ ha baroh ki jaka namar ym tip naei bad kumno ki bar jylla ki wan.
Shuh shuh u la ong ba kawei na ki lad jingiada na ka bynta kane ka dei tang lyngba ka ILP. “Ngi dawa ba dei ban pyntreikam noh ia ka ILP, ngi iohi ba lyngba kane ka jingjia, ki briew kiba na kiwei ki jylla ki wan rung suk ha kane ka jylla jong ngi, ki pyniap ia u briew, ki bret ia ka met bad shisngi ba ki la leh ia ka kam jong ki, ki phet bak sha la ka jylla”. U Bah Kupar u la pynkynmaw ruh ba ka jingjia ha Umsohson ruh ka dei na ki briew kiba na kawei ka jylla bad lada ka jingioh rung pathar kan iai bteng kumne ka iai ap ka jingma ia ka jylla bad ia baroh ki nongshong shnong. “Jin lada ka ILP ka don, kine ki briew kin hap ban thoh ia ka kyrteng jong ki, bad ban thoh ha ka register na ka bynta ban iathuh shaei ba ki leit, katno sngi kin sah bad lano kin leit phai. Ka por ka la dei ba ka Sorkar kan pyntreikam ia ka ILP ha kane ka jylla jong ngi”,
U Bah Synrem u la shim kabu ruh na kane ka jingjia da kaba kynthoh ia kito ki briew napoh ka jylla kiba leh shlur tang ha ki social media bad khaweit ban mih shakhmat ban pynpaw ia ka jingshisha halor ka jingshah kynnoh ka Jylla “Kane ka pyni ba ka jaidbynriew jong ngi ka donkam ia ka jingiatylli ban lait na ka jingshahñion jong ngi ha ki briew kiba nabar. Ngi kyntu ia ki para doh para snam ba wat nym heh nia tang na ki social media, mih shakhmat namar kane ka dei ka burom jong ngi namar lada shah ktah ia ka jaid bynriew ka ktah ia ngi baroh.
Ha katei ka jingiakhih, la iohi ruh ia ka jingthoh ba ki la rah kaba ong “Conrad Sangma ngi donkam ILP mynta ym dei hadien”.