Saw tylli ki jylla kin iaknieh ia ka takma ksiar ha ka jingialehkai basketball jong ka 2nd North East Olympic Games 2022 ha ka jingiakhun final jong ki shynrang bad kynthei ka ban long ha ka 15/11/22 ha Indoor Basketball Court kaba ha NEIGRIHMS.
Ka Meghalaya ka la ioh rung sha ka final ha ka liang ki kynthei hadien ba la lah ban pynliem noh ia ka Nagaland da 67-18 ha ka jingiakhun semi final kaba nyngkong ha ka 14/11/22. Te kumta kane ka kynhun ialehkai ka Jylla kan iakhun final pyrshah ia ka Sikkim, kaba la jop ia ka Mizoram da 81-32.
Ka jingiakhun final jong ki shynrang kan long hapdeng ka Mizoram bad ka Assam hadien ba kine ki kynhun ki la khur jingjop ha ka semi final. Ka Mizoram ka la pynliem ia ka Manipur da 96-62 hashwa ba ka Assam kan jop ia ka Nagaland da 73-71.
Ka jingiaknieh ia ka takma rnong kan long ha ka 15/11/22, ha kaba ka Nagaland kan iakhun pyrshah ia ka Mizoram ha ka liang ki kynthei ha ka por 9 baje mynstep, bad hadien yn bud sa ka jingiakhun ki shynrang hapdeng ka Manipur pyrshah ia ka Nagaland ha ka por 10:30 mynstep.
Ka jingiakhun final jong ki kynthei kan long hapdeng ka Meghalaya bad ka Sikkim ha ka por 1 baje nohphai sngi bad ha ka liang ki shynrang kan long hapdeng ka Mizoram pyrshah ia ka Assam ha ka por 2:30 janmiet.