Ha ka sngi ba ar jong ka Dorbar Mang Tyngka ka Khasi Hills Autonomous District Council (KHADC), u Bah Titosstar Well Chyne uba dei ruh u Nongïalam liang pyrshah u la khyrwit biang sa shisien ia ka Voice of the People’s Party (VPP) ha kaba iadei bad ka jingjop kput ha kane ka Elekshon MDC bad ka jingkular, ki mat treikam (Manifesto) kane ka seng.
Ha kaba iadei bad ka Elekshon MDC, u Bah Titos u la shaiong ngaiñ ba ka VPP kaba dei ka seng thymmai kan sar bad ioh synshar marwei ha KHADC bad u la ong ba kane ka dei ka sien ba nyngkong ba kan jia ha ka history jong ka KHADC.
U la ong ba hadien ba la wad bniah balei ba ka VPP ka jop kput bad satang 4 ngut ki MDC barim ki la wanphai lane don ha KHADC mynta, “Kaei kaba pynlong ia ka party jong phi ban sar lut ha kane ka Elekshon MDC ba mynta” ong u Bah Titos. Hadien ba u la Pule ia ka mat treikam (Manifesto) jong ka VPP, u la ong ba la lap ia ka jingkular ban kyntiew ia ka ioh kam, ioh jam ha ka jylla. Ban pynshisha, u Bah Titos u la pule ruh ia ka Manifesto kaba la thoh kumne “Ban pynshlur bad ai jingkyrshan katba lah ia ki briew ban seng kam lajong khamtam ha ki kam trei Kti bad karkhana ha la ïing”. Hadien ba la pule ia katei ka jingthoh, u la ong ba katei ka buit ban pynngop ka la khring ia kiba bun “Nga la pyrkhat ba kane kadei ba daw ba ktik bha, khamtam ia ki samla”
“Katno ngut phi lah ban thep kam hangne ha KHADC” buh jingkylli biang u Bah Titos. U la iathuh ba ha KHADC ym lah ban thep kam palat ia ka 5 ngut ha ka shi snem, kata ruh kynthup ia kiba khlad bad kiba shongthait.
U la kdew ruh ba ia kane ka mat, baroh ki sngew khia bad kwah ruh ia ka jingkylla “Nga ruh nga don ia ka ka juh ka jingthrang ba kumno ban weng ia ka jingkyrduh kam. Ka la mih shibun kiei kiei na ka jingbym don kam” ong u Bah Chyne.
“Nga khmih lynti ba ha kane ka Mang Tyngka ban wan, kan don ka Mang Tyngka kaba heh bha halor kane ka bynta. Nga kitbok ba kane ka EC kan lah ban pynurlong ia ka jingkhmih lynti jong ki paidbah”
Ha kaba iadei bad ka jingwanrah ia kane ka mat bad ka jingkrensiat ia ka VPP, u la pynkut da kaba ong “Kane kam dei ka jingkdew kti, hynrei kane ka dei ka jingkdew lynti”.