Hadien ka jingphet seng ki Nongïalam All India Trinamool Congress (TMC) ha Nongthymmai, hynne ka sngi u Dr. Mukul Sangma, uba dei ruh u Nongïalam ka kynhun TMC, u la kren shai ba da leilei ruh un ym leit phai shuh sha ka Seng Congress da kaba kdew ba ka Congress mynta kam iaid shuh ha ka lynti ba dei.
Haba kren sha ki lad pathai khubor, ha ka 4 tarik Nohprah 2024, u Dr. Mukul u la ong, "balei yn leit phai biang sha ka Congress, haba kane kajuh ka Party ka iatreilang bad ka National People’s Party (NPP) ha Khasi Hills Autonomous District Council (KHADC), kaba ïalam iaka Sorkar Jylla, kaba nga don hapdeng ka jingiakhun.Shuh shuh u la ong “Lada ka Meghalaya Congress ka iaid beit haka lynti ba dei, kan tip ha shwa ban shimrai ba kan iatreilang ne em bad ka NPP. Ka Congress ha ka Jylla ka kren pyrshah beit ia ka NPP hynrei sharieh pat ka ïatreilang “.
“Nga u Dr. Mukul Sangma ngan pynkut ïa ki khana hamsaia ba ngan leit phai sha ka Congress. Ngam lah ban iatreilang bad ki namar nga don ka nongrim kaba skhem ba ngan shakri ia ki paidbah bad ban kyntiew ia ka Jylla” .
U Dr. Mukul u la ong ruh ba um donkam iaka Congress ban ai ka jingshakri iaki paidbah namar ba u la sdang marwei ha ka kam saiñ pyrthei kum u kyrtong shimet, kumta um donkam iaka Congress. "Nga donkam tang ia ki paidbah kiban kyrshan ia nga " la kren shai u Dr. Mukul.Haba iadei bad ka jingkylliap lama noh ka TMC Nongthymmai Block u la ong “Kito kiba khylliap lama ki dei ki ‘riew shimet bad ki dei ki briew ki bym kwah ban iakhun namar kata, ki la pyndem wait noh daka ba khylliap lama”.
Halor ka jingshah rem ka kyrtong TMC ha Gambegre Constituency, u Dr. Mukul Sangma u la jubab "ngan iehnoh ia kane ka jingkylli ha phi, namar ha kane ka constituency ka la don ka jingpyndonkam ia ka bor sorkar ban sam ia ki skim kiba ha-rukom ha shwa ban long ka election.
Nalor kata u la ong ruh ba lada ka election ha Gambegre kam dei kaba shiteng samoi, da kaba thikna ba ka TMC ka la ioh ban jop na kane ka Constituency.