Mynta ka sngi uwei u briew uba dei u nongshong shnong jong ka nongbah Agra ula iabit na u khniang jingpang Covid-19 hadien ka jingwanphai jong u na ri China.
Ia kane la iathuh da u Chief Medical Officer jong ka nongbah Agra u Dr. Arun Srivastava. U Dr Arun ula iathuh ba utei u briew hadien ka jingwanpoi jong u na ri China ha ka 23 tarik ula phah test ialade ha ki jaka test Covid bad ka report ka paw ba ula ngat ha utei u khniang jingpang.
Kumba long mynta utei u briew u dang hap ban shong set slung ialade hapoh ka ïingsah la jong. Na ka liang ki bor jong ka koit ka khiah kila pynlong ka jingtest ia kiba ha ing hasem jong utei u briew bad kumjuh ruh ia kiba ia kynduh bad ha hapoh kine ki sngi ba u wanpoi na China.
Ka jinglap ia kane ka Case ha nongbah Agra kala sdang ban pynher syrngiew biang sa shisien ia ki nongshong shnong ioh ba kane ka wat ba saw bala tip kum u BF.7 kan lynshop biang ia ka nongbah, la ong Srivastava.
Kumban shu pynkynmaw ba ka World Health Organization (WHO) dang shen kala pynmih ia ka List jong ki ri ka pyrthei kiba kiew ka jingpang Covid nalor ka China ki long ka Japan, South Korea, US, France bad ka Brazil.