U Cheif Executive Member Jong ka KHADC u bah Pyniaid Sing Syiem mynta ka sngi ka 6 tarik Naiwieng 2024 u la plie ia ka Dwar Jingkhiah kaba la tip kum ka jaka sumar da ki dawai kynbat bad la tip ia ka kum ka Khasi Traditional ha Laitmawsiang, East Khasi Hills.
Ha Kane ka sngi plie pyrda ia kane ka jaka sumar ia ki briew da ki dawai kynbat la ia don ryngkat lang ki nongpyniaid jong kane ka jaka sumar naduh i President Mayfreen Ryntathiang i nongpyniaid jong kane ka jaka sumar u sordar jong ka shnong Laitmawsiang u bah Jiwon Riahtam, ki nongtrei kane ka jaka sumar bad kiwei kiwei.
Haba kren ha kane ka sngi kum u Kongsan U Bah Pyniaid Sing Syiem u la ong “Ba tang ba peit ia ka kyrteng dwar jingkhiah ruh la sngewkhiah lypa bad nga sngewtynnad ia kane ka kyrteng dwar jingkhiah bad mynta ka sngi ngi la ioh ban plie paidbah ia kane ka jaka sumar tynrai Khasi. Nga kyrkhu kyrdoh bad nga kitbok ia kane ka sienjam ba la shim da i kong Mayfreen Ryntathiang bad nga kyrmen skhem hapoh ka jingialam jong i ba in nang pyntyllun ia kane ka kam shakhmat ha ki por ba dang wan. Khamtam ha ka jingmut jingpyrkhat ba phin ia ieid ia ka kam naduh ka mynsiem ngi dei ban don ia kata ka jingthrang naduh ka mynsiem ban trei ia kano kano ka kam kaba wan ha ka jingim ka jong phi lada ngi pdiang ia kata ngi sngewthuh ba ka jaidbynriew kam long kaba duk hynrei ka jaidbynriew kaba riewspah haba iadei bad ka ioh kam ioh jam bad kumjuh ka jingseng ia kane ka jaka sumar ka long ruh kum shi bynta ban pynneh pynsah ia ka riti dustur”.
Shuh shuh u la ong “Ba katba ngi niew ngi la don lut ka shong ha nga ha phi ban sumar pat ia ka. Ka jingduh ki kynbat tynrai ha ka ri Khasi ba ieid jong ngi ka jingduh jait noh ki phlang kiba long dawai ki sla kiba long dawai ka jingduh noh ka dei ba ngim sumar ia ka mariang. Ka jingthang klaw ka dei kawei kaba pynduh jait ia ki kynbat tynrai jong ngi. Ki dawai kiba iarap ia ngi kum u khun bynriew.
Nga kyntu ia u Sordar ka Laitmawsiang bad ki nongshongshnong ban kiar ia ka thang khlaw khnang ban neh ban sah ka mei mariang bad kumjuh ban pynneh pynsah ia ki kynbat tynrai Khasi kiba dei ki dawai bah na ka bynta ka koit ka khiah jong ngi”.
U CEM ula ong ruh ba ka jingitynnad jong ka shnong ka thaw bad ka jaka ka khring ia ki nongwan jngohkai na kylleng ka ri, da ka jingdon jong ki lum ba itynnad ki khlaw ba itynnad bad ngi dei ban pynneh pynsah ia ka mei mariang namar ka jingwan ki nongjngoh kai ka dei kawei ka lad kaba ai ia ka jakpoh ia ki nongshong shnong jong ka Laitmawsiang bad ia ka Sohra hi baroh kawei.
