Ka Green-Tech Foundation kaba dei ka kynhun lane ka seng trei mon sngewbha ha kaba iadei bad ka jingkhuid bad ka jingpynjyrngam ia ka mariang, ka la pynlong ia ka jingiaid paidbah na Mawlai haduh Motphran bad ai ruh ia ka jingpynshai paidbah halor ka thong “Clean and Green” ha ka Jylla.
Ha ka jingialang ba la sangeh ha Motphran, u Bah Haban Nonglang uba dei u Chairman jong ka Green-Tech u la ong ba ka jingjaboh mynta ha ka jylla ka la paw nam bha ha India ha kaba ha u snem 2020, ka Nongbah Shillong ka la don ha ka kyrdan ba 6 kum ka Nongbah ba jakhlia tam ha ka Ri. U la ong ba kane kam dei ka jingleh jongno jongno hynrei ka rai na shimet shimet jong u nongshong Shnong.
U Bah Nonglang u la pynkynmaw ba ka Jylla kan sa pdiang ia ka National Games ha u snem 2027 hynrei hato ym lehrain mo lada kiwei ki Jylla ki iohi lut ia ki jingjaboh ka Jylla.
Shuh shuh u la ong ba ka jingnpyntuid ia ki jaboh na Ïewduh, Polo, mawprem bad kiwei kiwei ki dong sha Wah Umiam ka la long kaba i shyrkhei. “Lada Siang da ka ksiar ia ka pisa ba la mang man u snem na ka bynta ka Wah Umkhrah ka la dap”. U Bah Haban u la ong ba ka daw Bah ba ka Wah Umkhrah ka nang kiew ha ka jingjaboh ka dei na ka jingbym pyntrei hok ia ka kam “Ngim lah ban kynnoh ia ka Sorkar, teng teng ia kine ki kam la bynshet ha ki department, ha ki ophisar bad ha ki agency hynrei ngim iohi ei ei”.
Nalor kata, utei u Nongïalam ka Green- Tech u la angnud ba kane ka khubor kaba dei ban iakren shaphang ka jingkhuid, kan ym long tang ha ki Dorbar Shnong hynrei ha ki rynsan jong ki MLA bad wat ha ki rynsan niam bapher bapher.
