U Myntri Rangbah ka jylla Meghalaya, Conrad K. Sangma, ha ka jingialang jong ka 16 Finance Commission u la pynsngew halor ki jingeh, kiba kum ka Jylla ka iakynduh ban pyniaid ia ka roi ka par ban pynkiew ha ka Jylla , da kaba kdew ba ka sorkar kaba mynta ka la ïoh pateng ïa ki jingeh na ki por ba la leit noh.
Haba kren ha kane ka jingialang u Myntri rangbah u la ong, “Ha kiba bun ki bynta, ngim shym la leh bha, khamtam ha ka koit ka khiah bad ka pule puthi, ngi la shim ïa ka jingeh, ngi la ithuh ïa ki jingeh bad mynta ngi pynbeit ïa ki jingeh ha ka rukom kaba ryntih . ”.
Da kaba kdew halor ka jingïap jong ki longkmie longkmie (MMR), kaba long ar shah ïa ka jingïap jong ki longkmie ha ka ri ha u snem 2018, u Myntri Rangbah ka Jylla u la ong, “Ngi la wanrah ïa ka prokram ba pura (MOTHER) lyngba kaba ngi la ithuh ïa ki kynthei ba armet kiba don ha ka jingma kaba khraw, bad ki jingeh na ka bynta ka jingïap kaba jur bad la pynrung ia ka prokram na ka bynta ka jingsumar bad ki jingkha khun ha ki jaka sumar kiba shngain”.
“Ka jingiap jong ki longkmie ka don jingiadei bad ka jingeh ha ka imlang sahlang, ki jingtei bad kiwei kiwei ki jingshakri, kynthup ia ka jingpyniakhlad ia ka jingkha hapdeng arngut ki khun,” u la bynrap, haba kren shaphang ka jingiarap, kaba la sdang lyngba ka Prokram ‘Kmie ba shngain’ jong u Myntri Rangbah ka Jylla.
U la pyntip ruh ba ka sorkar ka la lah ban ïakhun ïa ki jingeh bad wanrah ïa ki lad pynbeit, kaba la wanrah ïa ka jinghiar ha ka MMR bad IMR ha ka jylla.
Haba buh ïa ka nongrim na ka bynta ka roi ka par, u myntri rangbah u la ong ba lyngba ka XVIth Finance Commission la ai khusnam ïa ka jylla Rs. 3000 Cr, bad lyngba ki projek ba la iarap nabar (EAPs), ka jylla ka la lah ban ioh ia ka jingiarap pisa kaba long kumba Rs. 9000 Cr, ban sdang ia ki kam pynroi.
“Lyngba ka jingïatreilang kaba la thaw bad ki bank pyrthei, ki jaka pule, ki skulbah kum ka Berkeley, ka jylla ka la lah ban kynthup ïa ki paralok kiba stad bad kiba stad na ka bynta ka jingthmu ba ïasam lang ban pynïaid shakhmat ïa ka jingangnud jong ka roi ka par bad ka jingroi jong ka jylla,” u la ban jur.
Haba aiti ia ka jingsah jingkynmaw jong ka jylla ha u Chairman jong ka XVIth Finance Commission u Dr. Arvind Panagariya, u myntri rangbah u la kren ruh ia ka jingdonkam jong kane ka jingialang, ka ban pynlah ia ka jylla ban nang bteng shuh shuh ia ka mishon jong ka ban pynkhih shakhmat ia ka roi ka par bad ka roi ka par jong ka jylla .
“Ngi khmih lynti ïa ka XVIth Finance Commission ban bishar bniah ïa ka jingthoh jingkynmaw jong ngi bad ban kyrshan ïa ngi ha ka rukom kaba biang ban pynurlong ïa ka jingthmu jong ngi na ka bynta ka Jylla Meghalaya,” bynrap biang u myntri rangbah ka Jylla.
Ha kane ka jingialang kaba la neh shisngi, ka Finance Commission kaba XVI ka la iakynduh kyrpang bad ki nongmihkhmat jong ka khaiī pateng, ki bor shnong nongkyndong, ki bor shnong sor bad ki seng saiñ pyrthei .