Ka Shillong Press Club ka la pynpaw ia ka jingsngewkhia halor ka jingjia kaba la jia shabar jong ka Shillong Press Club mynta ka sngi ka 12 tarik Nailur 2024 ha ka por kumba 1 baje eiei ha kaba la iohi ia ki dkhot jong ka Hynñiewtrep Youth Council (HYC) bad ki pulit ka Jylla ba ki la ia lum lang shabar jong ka Press Club, ha kaba iadei bad ka Press conference ba la thmu khot da u nongmihkhmat jong u Jagatguru Shankaracharya Swami Avimukteshwaranda Saraswati ha ka 12 tarik u Nailur ha ka por 1 baje nohphai sngi.
Ka Shillong Press Club ka kwah ban pynsngew ba ka Club ka dei ka kynhun kaba laitluid bad kaba khlem don liang ha kaba uwei pa uwei u briew bad ka kynhun, khlem da kheiñ ia ka jaitbynriew, ka jingngeit, ka shnong ka thaw, ka kolshor, bad ka niam la pdiang sngewbha ban pynlong ia ka jingialang bad ki nongthoh khubor halor kino kino ki mat.
Ka jingdon jong ki pulit bad ki nongialam bad ki dkhot jong ki seng treimon sngewbha mynta ka sngi ka pynhiar dor ia ka iktiar bad ka jinglong ba janai jong ka Shillong Press Club, kat haduh ba la kynnoh ia ka Club ba ka la pynsangeh noh ia katei ka jingialang pathai khubor kaba la thmu ban pynlong.
Ngi kwah ban pynshai ba ïa ka jingïalang bad ki nongthoh khubor ba la thmu la pynsangeh noh da ki nongialam ka Bramachari Mukundanand ha ka por khatwei baje, ym da ka Shillong Press Club.
Hadien ka jingïakren lyngkot bad u President ka SPC, ki nongïalam ka HYC ki la pyntip ba ka rai jong ki ban wan sha katei ka Club ka long ban pyrshah ïa ka jingpynbna jong katei ka seng ban pynlong ïa ka jingïalang ha Shillong halor ka Gau Dhwaj Sthapana Bharat Yatra ban pynbna ïa ka Masi kum ka Kmie jong ka Jaidbynriew. Hynrei dei ban kdew hangne ba katei ka jingleh kaba la iathuh ka dei tang ka jingmutdur namar ym shym la kdew satia ha ka shithi kaba la phah sha ka Shillong Press Club.
Kane ka long ban pyntip sha baroh kiba donkti ba ka Shillong Press Club kam ju ai kano kano ka jingthoh jingmynjur ban pynlong ia ki jingialang bad ki nongthoh khubor ha katei ka Press Club. Kane ka long ban pynshai shuh shuh ba ha kaba ïadei bad ka jingjia mynta ka sngi, na ka liang u President ka SPC u la khot dalade ïa ki dkhot jong ka Jagatguru Shankaracharya Swami Avimukteshwaranda Saraswati ban kylli bniah halor ka jingslem jong ki ban poi ha Club bad ki jingkynnoh jong ka SPC ba kyntait ïa ka jingkyrpad ban pynlong ia ka jingialang pathai khubor ka long kaba khlem nongrim.