Ka Sorkar jylla ka la khmih lynti ba shwa ka 22 tarik Naitung 2025, ki nongdie madan kim dei shuh ban shong die jingdie ha 9-Lad namar ka la pynkhreh mynta ia ka jaka ba paka na ka bynta jong ki, kata ha ka jaka ieng kali (parking lot) jong ka MUDA bad ka jaka ieng kali ha pyrshah jong ka SBI Bank, Shillong.
U Bah Sniawbhalang Dhar – Symbud Myntri Rangbah ka Jylla uba dei ruh u Myntri ba khmih ia ka Tnad Urban Affairs hynne ka sngi ka 9 tarik Naitung 2025 u la ong ba ka Sorkar ka don ia ka jingsngewskhem ba katkum ka tarik ba la buh (22 Naitung) na ka bynta ki nongdie madan, kan urlong namar ki la pynkhreh ia ka jaka ba paka na ka bynta ka kamai jong ki. U kyrmen ruh ba ki paidbah kin shimkhia hi dalade na ka bynta ka jingbha, ka jingitynnad, ka jingkylluid ka thain 9-Lad baroh kawei.
“Nga don ia ka jingtikna ba ki briew jong ngi kin ym ialeh pyrshah ia ka Sorkar. Hooid ngi iarap ban buh ia ki ha ka jaka kaba dei biang. Nga tip ki long ki briew kiba sngewthuh bad na ka liang jong nga hi shimet nga kyrpad ba kin iatreilang bad ka Sorkar.
“Hooid ngim lah ban ai ka jaka katkum u pud ba ki khmih lynti hynrei kum u Myntri ngan trei ha kata ka lynti kaba dei bad suki suki ngan buh ia ki ha ka jaka ba biang.
Ban pyntikna ba ia ka jaka ban shong kitei ki nongdie kan dei kaba paka u Myntri u la ong “Ngan leit khmih da lade na ka bynta ban pyntikna ba kin ioh ia ka jingshai kaba tikna (light), ka jaka leit shabar kaba biang bad shibun kiei kiei”.
Shuh shuh u la ong ba ki paidbah hi kin sngewthuh ia kane ka jingthmu jong ka Sorkar bad ym donkam ba yn wan ban kyndang biang namar kadei na ka bynta ka jingmyntoi lang.
